Peruluttut inissaqartinngilaat
- Uani assersuutissarput tassaavoq peruluttoq, kræfteqarnissaa ilimagineqartoq. Ullumikkutut inissisimatilluta, periarfissaqanngilagut piffissamik sivisunerusumik napparsimmavimmi uninngasuuteqassalluta. Taamaammat kommuninik pitsaasumik suleqateqarpugut, napparsimasut angerlarsimaffiini pitsaasumik sullinniartarlutigit, Peqqinnissaqarfiup qullersaqarfiani nakorsaaneq Carsten Thordal nassuiaavoq.
Qaqortormiu Heidi Møllerip anaanami peruluttup peqqinnissaqarfimmit imaluunniit kommunimit ikiorserneqartariaqarnera pillugu ilungersuuteqarluni
radioaviisimut oqaluttuarpoq. Arnaa 80-inik ukiulik puammigut kræftemut misissorneqarnini utoqqaavallaarnini pillugu unitsissimavaa, utoqqaallu angerlarsimaffianni inissaqannginnami angerlarsimasuulluni. Peqqinnissaqarfimmiillu nakorsaatinik tunineqartarpoq.
- Peruluttumut peqqisseqqissinnaanngitsumut atugassarititaasut aamma ilaqutaasunut atugassarititaasut ilungersunartarput. Aarlerisoqartarpoq ernumasoqarluni peqqinnissaqarfimmiillu misissuisoqartuartarnissaa pisariaqartinneqartarpoq. Taamaammat peqqinnissaqarfimmut saaffiginnittuarnissaat ammaffigaarput, nakorsaaneq Carsten Thordal nassuiaavoq, oqarlunilu ilaqutaasut kommunimut aamma peqqinnissaqarfimmut saaffiginnikkaangata nalilersuisoqartuartartoq aalajangiisoqartarlunilu qanoq pisoqarnissaanut.
- Aamma peruluttut napparsimmavimmut unitsinneqarallarnissaannik aalajangiisoqartarpoq, tassani anniannginneruniassammata nakorsaarsersorneqartarput, pitsaaneruleraangatalu angerlarteqqinneqartarput. Peruluttullu amerlanerusut pitsanngoriaraagamik angerlarteqqinneqarnissartik kissaatigisarpaat, Carsten Thordal oqarpoq.
