Qulaarpaa Persuttagaasartut ilaat illoqarfimminnit qimaasariaqartartut

Dorthe Sivertsenip aapparisaminit persuttagaaqqinnissani annilaangatigigamiuk illoqarfimmut allamut qimaasariaqarsimavoq.

- Qimaavunga, illoqarfimmiiginnarniaruma utikaffigillungalu ujaariuaannartussaagaminga, Dorthe oqaluttuarpoq.

Dorthe Sivertsen Danmarkimi maanna najugaqarpoq. Sisimiuni angummut ukiut arfinillit matuma siorna asannilersimavoq, aappariinnerminili nalaani persuttagaasalersimalluni.

- Sakkortuvoq unataariaasia. Allaat innarteqqallunga niaqua aalaatigaluni isini qaqortuinnanngortillugit ammut tamaat tilluartarnikuuaanga taavalu qimillunga.

Aamma atuaruk Arnat aapparisaminnit persuttarneqarnerpaasarput

Persuttagaasarsimanera ima sakkortutigaaq allaat inuunerminik ulorianartorsiortinneqartarsimalluni. Pingasoriarlunimi napparsimmavimmi uninngasimavoq.

- Oqara tungujortuinnaagami siutikka tungujortuinnaagamik, kiinara tamarmi aappaluttuaraannaagami, Dorthe oqaluttuarpoq.

Aapparisimasami qimavinnissaa siunertaralugu Sisimiunit Kangerlussuarmut qimaasimavoq.

Aapparisimasaatalu persuttaasarsimanini pineqaatissinneqaatigaa, pinerluuteqarsimasunut inissiisarfimmut inissinneqarluni.

Dorthemulli toqqissisimaneq sivikitsuinnaavoq. Aapparisimasaami pinerluuteqarsimasut inissiisarfiannut Kangerlussuarmiittumut inissinneqarsimasoq siumorpaa.

- Tuparujussuarpunga. Eqqartuussaareernermi taamanikkut isumaqaraluarama Kangerlussuarmut inissinneqassanngitsoq. Kangerlussuarmiikkatta uagut.

Dortheli Nunatsinni toqqissisimasutut misigisinnaannginnami Danmarkimut nuussimavoq. Danmarkimilu toqqissisimagaluarluni suli aporfeqarpoq.

- Massakkut aappaqarnissannut qunutoorujussuuvunga, taamanili qimakkakkuli. Qanillisoqartorlu pissutissarsiorlunga ajattulertarpakka. Misigissuseqalertullu asoorniapallallugillu. Suli massakkumut taamaappunga. Ersigaara.