Persuttaasarnerit kinguaassiuutitigullu pinerluttuliortarnerit ikiliartorput
Persuttaasarneq kinguaassiuutitigullu pinerluttuliortarnerit isiginiarneqarnerulersimanerat, unnerluutiginninnerit piffissami 1998-imiit 2002-mut amerleriarujussuarsimanerat, maanna mumikkiartortutut isikkoqalerpoq.
Persuttaanermik kinguaassiuutitigullu pinerlussimasunik politiinut unnerluutiginninnerit 2005-imiit 2008-mut 666-inik ikileriarsimanerat, ukiuni kingullerni tallimani-arfinilinni persuttaaneq kinguaassiuutitigullu atornerluisarneq pillugit isiginiarneqarnerat annertusisimanera tunngaviusoq politiit nalunaarusiaminnit allaatigaat.
Ilimagineqarpoq unioqqutitsinerit inuiaqatigiinniit akueriumaneqaratik suliakkiissutigineqartalersut, maanna unnerluutigineqartartut ikileriarnerannik kinguneqarpoq.
Bodil Karlshøj Poulsen Paarisami pisortaasoq isumaqarpoq suliniutit annertusineqarnerat siammasinnerallu aallaaviullutik persuttaasarnermik kinguaassiuutitigullu suliakkiissutigineqartartut appariarneranut iluaqutaasimasoq.
- Nuannareqaara kisitsisit appariarsimammata, pineqartummi piviusuummata. Misissorneqarnikuunngilarli suna pillugu kisitsisit appariarsimanersut. Uangali politiisulli oqarusunneruvunga, persuttaasarneq kinguaassiuutitigullu pinerluutigineqartartut isiginiarneqarnerat annertusisimasoq. Qitiusumit aammali illloqarfinni annerusumik minnerusumilluunniit pinaveersaartitsinerit ingerlanneqarnikuupput. Eqqaarusutamalu ilagaat illoqarfippassuarni meeqqat atuarfiinni atuartut soqutiginnillutik peqataanikuummata.
2007-imi meeqqat atuarfiini sammisaqartitsinermi meeqqat suliaqartinneqarlutillu aqqusinermi allagartarsualerlutik pisupput, tassani meeqqat timertik nammineq oqaasissaqarfigigitsik oqariatuutigalugu.
Persuttaasarneq kinguaassiuutitigullu atornerluisarneq pillugit isiginninnerulertoqarnikuuvoq suliniutillu amerlanikooqaat, isumaqarpungalu suliniuteqarnerulerneq oqallinnermillu pilersitsisimasut iluaqutaasimasut, Bodil Karlshøj Poulsen oqarpoq.
