Perorsaasut siunissamut ernumapput

Kommuneqarfik Sermersuumi meeqqeriviit meeraaqqeriviillu aaqqissuussaanermikkut allanngortinniarneqarnerinut atatillugu perorsaasut ilaat immikkoortortami pisortatut taaneqartut meeqqerivinni tallimani aqutsisunngortinneqassapput.

Perorsaasut meeqqerivinni immikkoortortaqarfimmi ataasiakkaani pisariaqartinneqarnertik naapertorlugu sulisassapput.

Meeqqerivimmi aqutsisut nooqattaarlutik sulisalernissaat perorsaasunut kingunerlussinnaasoq Perorsaasut Ilinniarsimasut Peqatigiiffianni siulittaasup tullianit Rita Joelsenimit uparuarneqarpoq.

- Kinguneqarnerlorujussuarsinnaavoq. Meeqqanik ineriartortitsineq unittoorsinnaavoq, meeqqap killiffiata malinnaaviginera unissaaq, aamma suleqatigiinnerliorneq aallartissaaq, aamma suleqatinut attaveqartarneq killeqalissaaq, Rita Joelsen, Perorsaasut Kattuffianni siulittaasup tullia oqarpoq.

Taanna isumaqarpoq suleqatigiinnerlunnermik kinguneqassasoq, aamma angajoqqaat suleqatigiillu attaveqaqatigiinnerannut akornutaassasoq.

- Meeraq toqqissilluni peroriartussaguni avatangiiserissaarlunilu sulisut ataavartut sulisorinissaat pisariaqarpoq. Angajoqqaat meeqqerivinnilu sulisut imminnut attaveqartarneri sulisut immikkoortortami pisortat suliffinni nooqattaarlutik sulisalerpata kimeerutissaaq, Kommuneqarfik Sermersuumi nikerartumik pisortaqalerutta qanoq inissisimassanerluta suli naluarput, Rita Joelsen oqarpoq.

Kommuneqarfik Sermersuup meeqqeriviit pillugit aaqqissuusseqqinnerani sulisunik atorluaanissaq siunertarineqarpoq, meeqqeriveqarnermut pisortaq Flavia Lyberth oqarpoq.

Angajoqqaat, meeqqat aamma perorsaasut aaqqissuusseqqinnissaq iluaqutigissagaat anguniarneqarpoq.