Permagreenip politiinut nalunaarutiginissaa isumaliutigaat
Maniitsumi Brugsenimi oktobarimi ajutoortoqarmat, suliffeqarfik Permagreen sulisunik pisariaqanngikkaluamik ulorianartorsiortitsisutut isumannaallisaanermullu peqqussutinik arlalinnik maleruaasimanngitsutut Sullivinnik nakkutilliisoqarfimmit nalilerneqarpoq.
Suliffeqarfik Permagreen peqqussutinik arlaqartunik piumaffigineqarpoq, Permagreenimi sulisut illersuutissanik naleqquttunik atugaqarnissaat piaartumik peqqussutigineqarluni.
Sulisut aalanut toqunartulinnut illersuuteqarsimannginnerat anersaartornermullu illersuutinik atugaqarsimannginnerat, Sullivinnik Nakkutilliisoqarfimmit taakkartorneqarpoq.
Atortunik akuutissanillu suliaqarnermi sulisut illersuuteqartarnissaat ilitsersuussutigineqartassasoq Permagreen aamma piumaffigineqarpoq. Tamanna piaartumik atuutilissasoq, Sullivinnik nakkutiliisoqarfimmit piumasarineqarpoq.
Permagreenimi sulisut akuutissartalinnik suliaqarnerminni ulorianaataasinnaasut qanoq kinguneqarsinnaanerat pillugu ilitsersorneqarsimanngillat. Taamaattumik akuutissartalinnik atortunillu ulorianaatilinnik suliaqarnermi ilitsersuutinik sanasoqarnissaanik Permagreen peqquneqarpoq.
Maniitsumi Brugsenimi ajutoorneq pivoq oktobarip 18-anni. Brugsenip suliarineqarnerani akuutissaq toqunartortalik Brugsenimut siaruaannerata kingorna Permagreenimi sanasut, Brugsenimi sulisut pisianiallu najuussuipput.
Taamani inuit 43-t timmisartumik Nuummi Dronning Ingridip napparsimavissualiaanneqarput.
Peqqussutsinik arlaqartunik piumaffiginninnermi saniatigut Permagreenip politiinut nalunaarutigineqarnissaa Sullivinnik Nakkutiliisoqarfimmit maannakkut eqqarsaatigineqarpoq.
