Periusissatut pilersaarut inaarsarneqaleruttorpoq
Tassanilu erseqqissarneqarpoq, Danmarkimi naalakkersuisut aamma Nunatsinni Naalakkersuisut ataatsimoorlutik erseqqissassagaat, aatsitassarsiornermi malittarisassat suut atuutissanersut, kalaallit namminneerlutik aalajangiiffigissagaat - matumani immami uuliasiorneq nunamiluunniit aatsitassarsiorneq pineqarpata assigiimmik.
Naalakkersuisut siulittaasuat Kuupik Klest, tunngaviusumik piumasaqaatit pillugit piffissangaatsiaq atorlugu angusaqarniarsimavoq.
Periusissatut pilersaarummi ima allaqqasoqassaaq "Issittumi pisuussutinik atuinermi, avatangiisillu illersorneqarneranni, siunissami Kunngeqarfiup issittortaani najugallit namminneerlutik aalajangiisarnissaat, Kunngeqarfimmi pingaarnertut siunertarineqarpoq".
Uuliamik gassimillu qalluinerni sillimanissamut piumasaqaatit sakkortunerpaat, teknologiilu pitsaanerpaaq atorlugit ingerlanneqartariaqartut periusissatut pilersaarummi naqissuserneqarpoq, kisiannili Kalaallit Nunaata aningaasaqarnikkut ineriartornissaata pingaarnerutinneqarnera tassa maanna naqissuserneqarpoq.
Qalasersuup pilerngunneqarneranut atatillugu, tamanna Danmarkip Nunattalu naalakkersuinikkut ataatsimoorussamik susassaqarfigigaat, periusissatut pilersaarutip naqissuserpaa.
Danmarkimi ministerit arlallit taamatut siunertaqarneq ilimasaarutigimisaareersimavaat, kisiannili tassa Qalasersuaq pillugu piumasaqaat maanna pisortatigoortumik Danmarkimit politikkerineqalermat, Ruslandimut naalagaaffinnullu allanut Qalasersuarmut soqutiginnittunut saqqummiunneqassaaq.
Uanili maluginiarneqassaaq Qalasersuaq nunarsuarmioqatigiit tamarmik pigisariaqaraluaraat, Kuupik Kleistip siornatigut isummersorfigimmagu. Kisianni tassa eqqarsaat tamanna issittumi atatsimoorussamik periuseqarnissamut pilersaarummi ilanngunneqanngilaq.
Aammattaaq ilanngunneqarsinnaavoq, Kalaallit Nunaata aatsitassatigut pisuussutaanut piginnaatitsissutit tunniussuunneqalerpata, Danmarkimi suliffeqarfiit salliutinneqarnissaat periusissatut pilersaarummi ilaatinneqanngimmat.
