Peqqussutit sukateriffigineqarmata upernaakkut ataatsimiinnissaq kinguartinneqartoq

Nualluut COVID-19 pillugu Nuummi peqqussutit sukateriffigineqarnerat pissutaalluni Inatsisartut upernaakkut ataatsimiinnissaat kinguartinneqarpoq. Inatsisartut siulittaasoqarfiat tusagassiutinut taama nalunaaruteqarpoq:

- Inatsisartut Siulittaasuata partiit siulittaasui tamaasa suleqatigiissitsisullu Inatsisartunut ilaasortatitaat ullumi ataatsimeeqatigai. Taamaalillutillu Nuummi pissutsit sukateriffigineqarnerat tunngavigalugu Inatsisartut upernaakkut ataatsimiinnissaata kinguartinneqarnissaa partiit tamarmik tamakkiisumik taperserpaat, Inatsisartut siulittaasuat Vivian Motzfeldt tusagassiutinut nalunaarummi oqarpoq.

AAMMA ATUARUK Nuuk matuvoq: Nalunaaqutaq 16:00-imiit ima ilioqqusaanngilatit

Nuummi aaqqissuussinerit inunnik qulinik amerlanerusunik peqataaffigineqartussat inerteqqutaalerput, illup iluani silamilu pisussat pineqarlutik. Taamatut inerteqquteqarneq ullumikkumiit marsip ulluisa 18-iannit sapaatip-akunnerini pingasuni atuuttussatut aalajangerneqarpoq, inatsisartullu upernaakkut ataatsimiinnissaraluannut tamanna kinguneqarpoq, ataatsimiinnissap qaammammik ataasiugallartumik kinguartinneqarnissaa Inatsisartut Siulittaasoqarfianit aalajangerneqarluni.

- COVID-19 pillugu Nuummi ineriartorneq Siulittaasoqarfimmit qanimut malinnaaffigineqassaaq aammalu Tunillaassortunik Nappaalanersuaqarneranut Ataatsimiititaliarsuup pissutsit sukaterilluni aalajangersagai malinneqassallutik, Inatsisartut siulittaasoqarfiat ilaatigut taama allaaserisaqarpoq, nangillunilu:

- Taamaalillunilu Inatsisartut ataatsimiinnissaannik pilersaarutaasumik kinguartitsineq qaammatip ataatsip qaangiunnerani sivitsoqqinneqarsinnaassaaq, inatsisartut siulittaasuat Vivian Motzfeldt oqarpoq.