Peqquserluttuliornermik nakkutiginnittut: Aalisariutitaarnissamut tapiissutit suliarineqarnerat misissortariaqarpoq

Siumumi politikerit nuimasut pingasut 800.000 koruunit nalingannut aalisariutisinissaminnut Namminersorlutik Oqartussanit tapiiffigineqarsimasut Sermitsiaq.AG-p allaaseraa.

Politikerit inatsit, tapiiffigineqarnerminnut tunngaviusoq, ilusilersuiffigeqataaffigaat, taamaammat tapiissuteqarnerit ilumut malittarisassat malillugit suliarineqarsimanersut Kukkunersiuinermik Ataatsimiititaliap imaluunniit Inatsisartut ombudsmandiata misissortariaqaraat peqquserluttuliornermik pinaveersaartitsinermut suliniaqatigiiffik Transparency International Greenland isumaqarpoq.

- Inatsit tamanut naligiisitsisuuvoq tamanullu atuulluni. Taamaammat inatsit tamanut assigiimmik atuutsinneqarsimanersoq misissorneqarnissaa, Transparency International Greenlandimiit inassutigaarput.

- Qinnuteqaatit tamarmik assigiimmik sivisussusilimmik suliarineqarpat? Qinnuteqartut allat politikerituulli amerlatigisunik taperneqarpat?, Transparency International Greenlandimi siulittaasup tullia Anita Hoffer aperaaq.

800.000 koruuninik tapiisoqartoq

Siumumi siulittaasup tullia, aamma aalisarnermut naalakkersuisuusimasoq Karl Kristian Kruse, aalisariummik nutaamik Poca 770-mik pisinissaanut 332.000 koruuninik siorna taperneqarsimasoq Sermitsiaq.ag allappoq.

Aalisarnermut naalakkersuisuusimasoq alla Nikkulaat Jeremiassen Poca 770-mik pisinissamut 265.000 koruuninik 2016-mi taperneqarpoq. Henrik Fleischerilu Inatsisartut Aalisarnermut Ataatsimiititaliaani maannakkut siulittaasuusoq, Poca 770-mik nutaamik pisinissamut 200.000 koruuninik 2016-imi aamma taperneqarpoq.

AAMMA ATUARUK Tusagassiuutit: Politikerit pisortanit tapiiffigineqarlutik aalisariutersisut

Inatsit unioqqutinneqarsimanngitsoq Karl Kristian Kruse, Nikkulaat Jeremiassen Henrik Fleischerilu Sermitsiaq.AG-mut oqarput. Tamarmik aalisarnermik inuussutissarsiuteqaramik taperneqarnertik ajortussaqannginnerarpaat.

Taamaamallu pineqartut misissuisoqarnissaanik noqqaassummut tapersiisariaqartut Anita Hoffer oqarpoq.

- Isumaqarunik kukkusimanatik taava inatsit tamanut naligiimmik atuutsinneqarnersoq assigiimmillu ingerlatsisoqarnersoq misissorneqarnissaa tapersertariaqarpaat, taanna oqarpoq.

- Taamatullu misissuinisamut tapersiisuni siulliusariaqarput.

Atornerluisoqarsinnaasoq

Inatsisartutut naalakkersuisutullu inatsisiliornermi sinaakkusiisimagaanni inatsisissap ilusissaanik sunneeqataasoqartarpoq.

Tamannalu aamma atornerlunneqarsinnaasoq Anita Hoffer oqarpoq.

- Piumasaqaatinik sinaakkuseeqataasimagaani, naggataatigullu piumasaqaatit tunngavigalugit ajornannginnerusumik qinnuteqaateqarsinnaagaanni, taava atorfimmik atornerluineruvoq. Aamma inatsisiliornermik sunniuteqarsinnaaneq atornerlunneqassaaq.

Taamaammat politikerit nuimasut qinnuteqaataat immikkut pineqaqqunagit inunnit arlalinit suliarineqartarnissaat, peqquserluttuliornissamik pinaveersaartitsisut siunnersuutigaat.

- Suliaq arlalinnut suliassanngortinneqarsinnaavoq. Sulisut ataasiakkaat taamaalillutik suliaq kisermaallugu suliarinagu.