Peqquserluttuliornermi suliami eqqartuussut: Lars-Emil Johansen aamma Lars Møller-Sørensen eqqartuunneqarput

Lars-Emil Johansen oqartussani atorfimminik atornerluisimasutut eqqartuunneqartoq ilanngutassiami siusinnerusukkut allassimagaluarpoq. Tamanna eqqortuunngilaq. Lars Møller-Sørenseniuna tassunga eqqartuunneqartoq. KNR-ip kukkuneq ajuusaarutigaa.

Naalakkersuisut siulittaasorisimasaata, Lars-Emil Johansenip aamma kommunimi pisortaanerusimasup, Lars Møller-Sørensenip unnerluutigineqarnerani suliami eqqartuussuteqartoqarpoq.

Taakku tamarmik qaammatini arfinilinni pineqaatissinneqarsimasunut inissiisarfimmiittussanngortinneqarput taarsiissuteqassallutillu.

Ataatsimoorlutik Lars-Emil Johansenimut sulianut suliarisimanngisaanut ukiut marluk ingerlaneranni 730.000 koruuninik tunniussaqarsimasutut unnerluutigineqarput.

Eqqartuussut atuuttussaatinneqarpoq. Lars-Emil Johansen aamma Lars Møller-Sørensen peqatigiillutik peqquserluuteqarsimasut eqqartuussivik isumaqarpoq, eqqartuussiviullu tamanna ilungersunarluinnartumik peqquserlunnerunera pingaartuutippaa.

- Pinerluttuliorneq ingasattuusoq, eqqartuussivik isumaqatigivara, kisianni isumaqarpunga unnerluutigisaasut pillugit paasissutissaqartoq, aatsaat pinerluuteqaqqikkunik aatsaat inissiisarfimmiiittussanngortitsineqarnissaannik eqqartuussinissamut naapertuuttunik. Kisianni Eqqartuussivik allaanerusumik tassa naliliivoq, immikkut unnerluussisussaatitaasoq, Bo Bjerregaard eqqartuussinerup kingunitsianngua oqarpoq.

Lars Møller Sørensenilu oqartussaaffimmik atornerluisimasutut aamma eqqartuunneqarpoq. Eqqartuussivik naapertorlugu Lars Møller-Sørensenip atuuffimminik atornerluinera pissutsinut sukannernerulersitsivoq.

Lars-Emil Johansenip aamma Lars Møller-Sørensenip eqqartuussut pinngitsuutinneqarnissaq piumasaralugu Nunatta Eqqartuussisuuneqarfianuit suliarineqaqqitassanngortippaat.

730.000 koruunit akiliutigineqartut

Suliaq Lars-Emil Johansenip Kommuneqarfik Sermersuumi 2019-imi novembarimi qaammammut 25.000 koruuninik akissarsialerlugu atorfinitsinneqarneranut tunngavoq. 

Akissarsialli taakku 2020-mi septembarip aallaqqaataani tapit pissutigalugit 40.000 koruuninut qaffanneqarput.

Lars-Emil Johansen taamaalilluni Lars Møller-Sørensenimit ikiorneqarluni siunnersortitut tunngavissaqanngitsumik 730.000 koruuninik akilerneqarpoq.

Illuatungeriit Kommuneqarfik Sermersuumut taarsiissuteqassapput.

KNR-ip suliami illuatungeriit oqaaseqartinniarsaraat. Angutit marluk illersuisui oqaaseqarusunngillat.

Tasiilami Kofoeds Skole

Lars-Emil Johansen Tasiilami innuttaasunut atugarliortunut ikiuutaasussamut atuarfimmut, Kofoeds Skolemut atatillugu avataanit siunnersortitut atorfinitsinneqarsimasoq eqqartuussivimmi saqqummiunneqarpoq.

- Lars-Emil Johansenillu toqqarnissaa kajuminnartuuvoq, Lars Møller-Sørensen eqqartuussivimmi oqarpoq, tamannalu politikeriusimasup ilaatigut politikkikkut attuumaffippassuaqarneranut atassuteqarluarneranillu pissuteqarnerarlugu.

Lars-Emil Johansenip iliuuseqarsimanngitsutut unnerluutigineqarnini paasiuminaatsippaa.

- Isumassarsiaq taanna suminngaanneernersoq paasisinnaanngilara, kommunimi pisortaq taama isumaqatigiissusiorsinnaasoq inatsisit malillugit isumaqatigiissuteqarfigaara. Pasilliutigineqartorlu ilisarisinnaanagu. Eqqungajanngilarluunniit, Lars-Emil Johansen oqarpoq.