Peqqissutsimut naalakkersuisuusimasoq: Kikkut tamarmik sukkasuumik misissuutisisinnaanngillat

Misissuisarfinni nalunaaquttap akunneri arlallit utaqqisarnerit  sivikillisarneqartariaqarput.

Marlunngornermi tusagassiortunik katersortitsinermi Naalakkersuisut nalunaarutaat taama imaqarpoq.

Kingunerissavaa ersiutillit kisimik misissuisarfiliartalissasut. Inuit qularnannginnerusumiinniartut nammineq sukkasuumik misissortassapput. 

Naalakkersuisut innersuussutaat taamaappoq, marlunngormallu ullulersinnaanngilaat nammineq misissuutit qaqugu pisiniarfinni nunaqarfinnilu piareersimalissanersut.  

AAMMA ATUARUK Sukkasuumik misissuutit Matasimi pisiassat 1.400-it ullut marluunngitsulluunniit nunguttut

Sukkasuumik misissuut ataaseq 40 koruunit missaanni akeqarpoq, Naalakkersuisunillu nalunaarut siornatigut peqqissutsimut naalakkersuisuusimasup Demokraatineersup  Anna Wangenheimip kappiagaa. 

Taanna Inatsisartuni Ilaqutariinnermut Peqqissutsimullu ataatsimiititaliami siulitaasumut tullersortaavoq, utaqqisut ikilisarneqarnissaannik siunertaq ajunngikkaluaqisoq inuiaqatigiinni inissisimaneq tunngavigalugu equngasoq isumaqarpoq. 

- Aperisariaqarpunga, kikkut taamaaliornissamut periarfissaqarpat? Tassami misissuutinut akissallit periarfissaqarput. Nalunngilarput ataaseq akisoqisoq, imaanngilarlu kikkut tamarmik akissaqartut, Anna Wangenheim oqarpoq.

Attaveqaqatigiinnerup inuiaqatigiinni inissisimaneq equngasumik eqqorsinnaavaa

Aamma isumaqarpoq Naalakkersuisut inuiaqatigiinni inissisimaneq equngasumik eqqoraat tusagassiortunik ataatsimiititsinermi oqarnermikkut inuit corona.nun.gl-imi nutaamik paasisaqarniartassasut illoqarfimminni killilersuisoqalernersoq paasiniarlugu.

- Imaanngilaq innuttaasut tamarmik nittartakkat paasisutissiissutit iserfigisinnagaat, soorlu utoqqaat allalluunniit internettimut akissaqanngitsut. Taamaalilluni peqqissutsimut paasissutissanik isersinnaanissaq eqqarsaatigalugu paasisaqarsinnanngitsut eqqugaasorujussuupput, Anna Wangenheim oqarpoq.

AAMMA ATUARUK Corona: Killilersuutit nutaat

Marlunngormat tusagassiortunik katersortitsinermi oqaatigineqarpoq coronapas-eqarnissamut piumasaqaat taamaallaat illoqarfinni nunaqarfinnilu sapaatip akunnerini kingullerni marlunni  ilisimaneqanngitsumik aallaavilinnik tuniluuttoqarfinni.

Illoqarfiit nunaqarfiillu aqqi Nakorsaaneqarfiup nittartagaani, nun.gl-imi ilisimatitsissutigineqasssapput. Kingunerisaanik illoqarfik nunaqarfilluunniit allattorsimaffimmut ilanngunneqaraangat taava killilersuutit atuutilersarput:

• Coronapas-imik takutitsisarnissaq piumasaqaataavoq 
• Inini tamanit iserneqarsinnaasuni isersinnasut amerlanerpaaffilerlugit  - tassa imaappoq qatserisartut isersimasut amerlassusaannik akuerisaasa affaat isersimasinnaapput. 
• Tamani kikkut tamarmik tikissinnaassaanni qanermut assiaqut atorneqassaaq.