Sukkasuumik misissuutit Matasimi pisiassat 1.400-it ullut marluunngitsulluunniit nunguttut
Nungupput.
Nuummi Matasip nammineerluni misissuutinik pisiniartut taama akissuteqarfigai.
Nammineerluni sukkasuumik misissuutit 1.400-it ilitsivinnit nungunnissaannut ullut marlulluunniit qaangiutinngillat.
- Pilerngunneqartorujussuupput. Ippassaq 1.400-inik tikittoorpugut, akunnerillu arfinillit ingerlanerini 1.000-it tunivagut. Ippassaq sinnigut 400-it nungulluinnalerput, pisortap tullersortaa, Geraldine Lastein oqarpoq.
Arkalo Lyberth iluatsitsilluni misissuutinik pisinissamut angumersisunut ilaavoq.
- Angalasussaagama. Kangerlussuakkoorlunga Maniitsumukartussaagama aqagu, taavalu timmisartortussaallungalu taava eqqissimaarnerusumik misiginiarlunga.
Gerda Kreutzmann Mørch pisinissaminut aamma piareersimavoq:
- Illoqatima ilaat peqqippallaannginnami, taava silami utaqqerujussuarusunnginnami misiliiniartugut, nammineq testerluta.
Taakku ilaqutariinni nammineerlutik misissuillutit aatsaat misililerpaat.
- Paasipallakkusunnarami, aamma utaqqineq sivisusarnermik akissutisinissamut.
Múte B. Egedep nammineq misissornissaq kaammattuutigaa
Naalakkersuisut siulittaasuata, Múte B. Egedep nammineq misissornerup annertusarneqarnissaa marlunngornermi kaammattuutigimmagu pisiniartorpassuanngorput. Misissuisarfimmummi ersiutilinnut kisimik misissortikkiartortalerunik akunnerpassuarni siuleriiaattorpassuaqartarnera aatsaat annikillineqarsinnaavoq.
Qularnannginnerusumiinniaannarlutik misissortinniartut nammineerluni misissorsinnaaneq, nunatsinni illoqarfinni nunaqarfinnilu tamani aamma periarfissanngortussaq periarfissarissagaat, Múte B. Egede oqarpoq.
Nunatsinnili innuttaasunut 56.000-inut nammineerluni misissornissamut atortussarpassuit illoqarfinni nunaqarfinnilu pisiniarfinni qaqugu periarfissaalissanerat Naalakkersuisut neriorsuutigerusunngilaat.
- Kisianni aqaguusinnaanngilaq aqaguaguluunniit, Múte B. Egede erseqqissaavoq.
Nuummilu Matasimi pisiassat maanna aamma nungupput.
Sukkasuumik misissuutit angalanissamut atorneqarsinnaanngitsut
Lis Stender nammineerluni misissuutinik nunguussaasunut ilaavoq.
- Uggoraara, isumaqaramami tuniluunnerujuusuaq maannakkoqqissaaq pisoq. Matasiliajaarsimagaluaruma naammattunik pisisimassagaluarpunga. Tassami misissuisarfimmi akunnerit pingasut utaqqisoqartarpoq, taamaaliorusunngilangalu.
Qanormi iliussavit?
- Misissuisarfiliartariaqarpunga, utaqqisullu akornanniittariaqarlunga. Uggorigaluaqaara, tassami tunuleriiaani aamma tuniluuttoqariaannaavoq
Nammineerluni misissornerit coronapasimut nalunaarsorneqarneq ajorput.
AAMMA ATUARUK Corona: Killilersuutit nutaat
Nammineerluni misissuutinik akissutit nunatsinnut angalaniarnermut aamma atorneqarsinnaanngillat. Angalanissamut PCR-imik misissortinneq atorneqassaaq.
Nunatta iluani angalaniartut tamakkiisumik akiuussuserneqarsimasut aamma inuit sapaatit akunnerisa aqqaneq-marluk kingulliit iluanni tunillatsinnikuusimasut meeqqallu marluk ataallugit ukiullit misissorteqqaaratik angalasinnaapput.
- Marlunnik ukioqalereersimasut akiuussusertissimanngitsut illoqarfimmit/nunaqarfimmiillu aallannginnerminni sumiiffigisaanni tunillatsissimasoqarsimanersoq apeqqutaatinnagu misissorteqqaassapput.
