Peqqissutsimut Ataatsimiititaliaq Savalimmiunut paasisassarsiorpoq

Peqqinnissaqarfiup aqunneqarnera aaqqissugaaneralu pillugit siunnersuummik ukiakkut ataatsimiinnissami Naalakkersuisut saqqummiussinissaat naatsorsuutigineqarpoq. Taamaattumik Savalimmiuni peqqinnissaqarfik qanoq ingerlanersoq paasissallugu ataatsimiititaliamit soqutigineqarpoq. Savalimmiuni Kalaallit Nunaannilu peqqinnissaqarfiit arlalinnik assigiinnik – assigiinngissuteqarsinnaasunillu - aaqqinniagassaqarput, Peqqissutsimut Ataatsimiititaliaq taama nalunaarpoq.

Kalaallit Nunaanisulli Savalimmiuni napparsimasut ilaat nunanut allanut katsorsartikkiartorlugit aallartittariaqartarpaat. Kalaallit Nunaanisulli Savalimmiuni nakorsassaaleqineqarpoq. Aamma nappaatit inooriaatsimit pinngortut, katsorsaariaatsit nutaat inuiaqatigiillu najugaqartariaatsip ineriartornerata peqqinnissaqarfiup nukissaanik tatisinerat nunat taakku marluk ilisimalluarpaat. Akerlianik inuiaqatigiit atortulersuutaatigut ajornartorsiutit ilaat Savalimmiuni qaangerneqarput, siusinnerusukkut taakku pissutaallutik napparsimasut timmisartumik qulimiguulimmilluunniit angallanneqartariaqartarlutik.

Nunarsuarmut tamarmut sanilliullugu nunatsinni naartuersittartut amerlapput. Taakku qanoq ikilisinneqarsinnaanerannik apeqqut inuppassuarnit soqutigineqarpoq. Atuisut ilaannakortumik akiliuteqartinnerisigut naartuersittartut ikilisinneqarsinnaanersut tusagassiuutitigut ataatsimiititaliamilu kingullertigut oqallisigineqarpoq. Naartuersittarneq pillugu oqallinneq Savalimmiuni allaanerujussuuvoq, tamatumani naartuersittarneq pillugu inatsit killilersuisorujussuummat aammalu naartuersittartut ikitsuaraallutik.

Assigiissutsit assigiinngissutsillu ataatsimiititaliamit soqutigineqarsinnaassapput nunatsinnilu peqqinnissaqarfiup suliassariligai qanoq ililluta pitsaanerpaamik ingerlassinnaanerinut naliliinissamut tapeeqataassallutik.

Aammattaaq Savalimmiuni napparsimalersinnaanermut sillimmasiisarnermik aaqqissuussineq nutaaq pillugu ilisimatinneqarnissani ataatsimiititaliap soqutigaa. Aamma tamatumani isumassarsiortoqarsinnaassaaq.