Peqqissaasut nunanit allameersut Nunatsinni misiligutitut atorfinitsinniarneqalerput.

Dronning Ingridip Napparsimavissuani peqqissaasuunerit marluk Danmarkimi feeriareerlutik uteriarnertik iluatsillugu Hollandimi atorfininniarlutik nalunaarsimasunik oqaloqatiginnikkiartorlutik sapaatip akunnerata tulliani aallassapput. Taama ilisimatitsivoq Dronning Ingrid-ip Napparsimavissuani peqqissaasut qullersaat, Maybritt Andersen. Peqqissaasut ilinniarluarsimasuupput, tamannalu Nunatsinni Nakorsaaneqarfiup qulakkeertarpaa sulisinnaatitaanermik tunisinermigut. Oqaatsit taakku apeqqutaanerpaajupput ataavartumillu sulisinnaatitaanermik pissarsisinnaanissamut matuersaataallutik. Peqqissaasut Hollandimeersut sulisussarsiuussisarfik suleqatigalugu pissarsiariniarneqarput oqaatsitiguttaaq piukkunnarsarneq sulisussarsiuussisarfiup isumagissavaa, tamanna Hollandimi qaammatini pingasuni Nuummilu qaammat ataaseq pissapput.

aggustip 28-at 2009 16:22

Peqqissaasut qullersaata oqarneratut:

- Napparsimasunik sullissinermi suleqatinillu paaseqateqarsinnaanermi oqaatsit pingaartumik sakkuupput pingaarutilerujussuit. Paasissutissat pingaarutillit napparsimasup, peqqissaasup, nakorsap allallu peqqinnissakkut, tamatumalu avataani, sullissisut akunnerminni paasissutissanik pingaarutilinnik paarlaasseqatigiinnermikkut pissarsiarisartagaat, katsorsaanermi aalajangeeqataasarput.

Danmarkimi misilittakkat ilaatigut pitsaasuupput Napparsimavissuarmi Hollandimeersumik nakorsaqarpoq oqaatsinik ilikkarluarsimasumik.

Isumaqatigiissutit Nunatsinni atuuttut naapertorlugit sivikinnerpaamik ukiuni pingasuni atorfinitsinnisaq pilersaarutaavoq Iluatsilluassappat Holland-imiut arfineq-marluk atorfigilerumaagassaminnut piukkunnarsakkat ukiortaamiit tikilluaqqusinnaassavagut.

Peqqissaasut nunanit allameersut Nunatsinni misiligutitut atorfinitsinniarneqalerput.

Aamma atuaruk