Peqqissaasut Kattuffiat: Suliassanngortitsilerpugut

Peqqinnissaqarfimmi peqqissaasunut qullersaasimasup, Lisbeth Lumby Rasmussenip, soraarsitaanera naammaginagu, Peqqissaasut Kattuffiata Namminersorlutik Oqartussat maanna eqqartuussisulersuunnialerpaat, isumaqaramik soraarsitsineq tunngavissaqanngitsuusoq.

- Peqqinnissaqarfimmi qullersat sisamaasuni arnartatuaat soraarsitaavoq angutillu annerpaamik mianersoqqussummik tunineqaannarlutik.

Peqqissaasut Kattuffianni siulittaasoq, Inuuti Fleischer taama oqarpoq.

Peqqinnissaqarfimmi qullersanut sisamaasunut suliaq, upernassaq marsimili aallartippoq. Peqqissaasut qullersaata soraarsitaanera naligiissitaanissamut inatsimmut unioqqutitsinertut, Peqqissaasut Kattuffiata isigalugu, Namminersorlutik Oqartussat eqqartuussisunut suliassanngortitsipput.

- Upernaaq manna pisoq aallaavigalugu, kattuffitsinni isumaqarpugut arnat angutillu assigiimmik isigineqartartussaasut, Inuuti Fleischer oqarpoq.

Suliaq pillugu Namminersorlutik Oqartussanit nalunaarutigineqareerpoq, pisoq pillugu qanoq iliuuseqaqqinniaratik, tassalu tamannarpiaq pillugu Peqqissaasut Kattuffiat eqqartuussisunut suliakkiipput.

- Eqqartuussisisulersuussinitsinnut aamma tunngaviuvoq, suliaq marsimili aallartittoq naammassivittutut kattuffitsinnit isiginnginnatsigu aamma ilaasortatta taama pineqarnera tusaanngitsuusaaginnarsinnaannginnatsigu, suliaq aallartimmalli siunertaraarput eqqartuussisulersuussiniarluta.

Peqqissaasut Kattuffianni siulittaasoq, Inuuti Fleischer taama oqarpoq.

Peqqinnissaqarfimmi Oqartussat qullersaat, Ann Birkekær Kjeldsen pisumut ullaaq manna oqaaseqartissinnaasimanngilarput.