Peqqissaasut Hollandimiut nunatsinnukanngiinnassapput
Novembariuinnalersoq qinnuteqarniartut pingasuinnanngorsimapput. Taakkununngalu juumooq aamma laboratoriami sulisoq qinnuteqarniartunut ilanngussimapput.
Maanna peqqissaasut tamarmik juumoorlu qinnuteqarniarunnaaginnarsimapput, qinnuteqarniartunilu kiserngoruttoq tassaavoq, laboratoriami sulisoq, taama ilisimatitsivoq Dronnging Ingridip napparsimmavissuani sulisunut allaffeqarfimmilu pisortaq, Mogens Bendtsen.
- Laboratoriami sulisup sinerissami marsimi sulilernissaa naatsorsuutigaarput, tassa qallunaat oqaasiinik pikkorissarnerminik angusisimappat, akuersissutillu pisariaqartinneqartut pissarsiarisimappagit, pisortaq taanna Sermitsiamut oqarpoq.
Namminersorlutik Oqartussat aamma sulisut kattuffiata PPK-p, oqaatsinik ilinniartitsinermi akissarsiassat pillugit aaqqiagiinnginnerat, Hollandimiut peqqissaasut atorfinitsinniarnerannut sivitsorsaataasimavoq. Tamannalu pissutigalugu Hollandimiut qinnuteqarniaraluartut suliniut pimoorussaanngitsutut isigilersimavaat.
Taama Sermitsiamut ilisimatitsivoq nakorsanut taartaasartunut sullissivimmi namminersortumi pisortaq, Carl Frederik Nagell. Suliffeqarfik taanna peqqissaasut qinnuteqarniartut aamma Namminersorlutik Oqartussat akornanni akunnermiliuttuuvoq.
