Peqqissaasut 600-nit amerlanerusut coronavirusimik nunarsuaq tamakkerlugu toqquteqarsimasut
Peqqissaasut 600-nit amerlanerusut nappaammik Covid-19-imik nunarsuaq tamakkerlugu toqquteqarsimapput. Nunat tamalaat peqqissaasuisa kattuffiat, ICN, taama ilisimatitsivoq.
Napparsimmavinni paaqqinnittarfinnilu sulisut katillugit 450.000-t coronavirusimik tunillanneqarsimasut ilimagineqarpoq.
Peqqissaasut coronavirusimik toqquteqartut qaammatip kingulliup ingerlanerani marloriaammik amerlisut, kisitsisit nunanit 30-nit amerlanerusuneersut takutippaat. Coronavirusimik toqquteqarsimasut maajip ulluisa arfernanni 260-iupput, maannalu tassa 600-t sinnerlugit.
- Peqqissaasut Covid-19-imik toqquteqartut qaammatit kingulliit marluk ingerlaneranni 100-t missaanniissimariarlutik maanna 600-t sinneraat takusinnaavarput, ICN-ip Genèvemi allattoqarfiani aqutsisoq, Howard Catton, oqarpoq.
- Amerliartuinnavissappullu, taanna oqarpoq.
Peqqissaasut 20 millioninit amerlanerusut ICN-imi ilaasortaapput.
AAMMA ATUARUK Peqqissaasoq coronavirus pillugu: Tupannartorujussuuvoq
Nunarsuaq tamakkerlugu coronavirusimik tunillanneqarsimasut 7 procentii napparsimmavinni peqqissaaveqarfinnilu sulisuupput.
Peqqissaasut suliatigut peqatigiit akornanni coronap ajornartoortitsinerani taamaasillutik eqqorneqarnerpaanut ilaapput. Peqqinnissaqarfimmi sulisut tamanna pillugu nunat tamalaat illersornerusariaqaraat, ICN-imit kaammattuutigineqarpoq.