Peqqinnissaqarfiup qullersaqarfiani atorfillit pingasut suliunnaarsitaagallarput
Suliunnaarsinneqartut tassaapput peqqinissaqarfiup qullersaqarfiata pisortaa Kurt Nielsen, nakorsat pisortaat Carsten Thordahl kiisalu peqqissaasut pisortaat Lisbeth Lumby Rasmussen.
Peqqinnissaqarfiup iluani siumoortumik akissarsisitsisarsimanerit isornartoqarsinnaasut kukkunersiuisunit paasineqarsimavoq, tamannalu pissutaalluni suliunnaarsitsisimasoq, Peqqissutsimut Naalakkersuisoqarfimmi pisortaq Ann Birkekær Kjeldsen oqarpoq:
- Akissarsisitsisarsimanerit apeqquserneqarsinnaasut, akissarsiat pillugit isumaqatigiinniarnerit nalaanni paasineqarsimapput, misissuiffigineqarnissaallu aalajangerneqarluni. Sulisut pineqartut soraarsitaanissaat taamaammat aalajangerneqarpoq, Peqqissutsimut Naalakkersuisoqarfimmi pisortaq Ann Birkekær Kjeldsen oqarpoq.
Pisortat taakku suliunnaarsinneqarnissaat taassuma aalajangerpaa.
- Kukkunersiuisut oqarpata isornartoqarsinnaasoq, taava soorunami misissuisoqassaaq, kukkunersiuisullu akornusersorneqaratik sulisinnaasariaqassapput, Ann Birkekær Kjeldsen oqarpoq.
Siumoortumilli akissarsisitsisarsimanerit pisortanut taakkununnga tunngassuteqanngitsut, taassuma erseqqissaatigaa:
- Inunnut taakkununnga tunngassuteqanngitsoq oqaatigisinnaavara, Ann Birkekær Kjeldsen oqarpoq.
Suliamut atatillugu sukumiinerusumik oqaaseqarsinnaannginnerarpoq, misissuinerimmi inerneri utaqqimaaqqaarniarpaat:
- Suliami uani suli qulaajagassaqarpoq, ingerlatsinermulli malittarisassat matumani unioqqutinneqarsimanersut misissorneqassasut oqaatigisinnaavara. Aqutsisummi tamakkununnga akisussaasuupput, Ann Birkekær Kjeldsen oqarpoq.
Suliaq pillugu sapaatip-akunnerup massuma ingerlanerani annertunerusumik paasisimasaqarnerulernissani, Ann Birkekær Kjeldsenip neriuutigaa.
Peqqinnisaqarfiup qullersaqarfiani pisortanngorallartut tassaapput Henrik Overvad, Ella Skifte aamma Kent Kleinschmidt.
Qullersaqarfimmi pisortaasimasoq Kurt Nielsen, nakorsat pisortarisimasaat Carsten Thordahl aamma peqqissaasut pisortarisimasaat Lisbeth Lumby Rasmussen 2010-mi atorfinipput, tamarmillu Danmarkiminngaanneersuullutik.
