Peqqinnissaqarfiup pisortaa soraarsitaavoq
Tassani pineqarput peqqinnissaqarfiup pisortaa Kurt Nielsen aamma peqqissaasut pisortaat Lisbeth L. Rasmussen. Aammali Radioaviisimit paasineqarpoq, nakorsat pisortaat Carsten Thordahl, mianersoqqussummik taamaallaat tunineqartoq.
Suliunnaarallarsitsineq marsip naalernerani pivoq, tassani peqqinnissaqarfiup pisortai pingasut ingerlaannartumik suliunnaarallarsinneqarput.
Siumoortumik akissarsisitsisarsimanerit apeqquserneqarsinnaasut kukkunersiuisunit paasineqareersullu, tamanna pivoq.
Akissarsititsissutit taakkua siumoortumik akissartitsinerupput, nunap imikkoortuini
nakorsat qullersaat, nakorsaanerit aamma nunat immikkoortuini peqqissaasut qullersaasa akissarsiassaat piffissap taamalernerani suli isumaqatigiissutigineqarsimanngimmata.
Peqqissutsimut Naalakkersuisoqarfimmi pisortap, Ann Birkekær Kjeldsen, marsip 28-ani erseqqissaatigaa, Peqqinnissaqarfiup Qullersaqarfiani pisortat akiliutigisaat inuttaannut namminernut tussimanngitsut.
Paarlattuanilli aningaasat nunap immikkoortuini nakorsat qullersaannut siumoortumik aningaasarsiatut tunniunneqarsimasut.
Peqqinmnissaqarfiup aaqqissuuteqqinneqarneranut atatillugu sulisut taamatut atorfillit inissisimaffiinit 2010-mi ukiakkut tunuartinneqarput, atorfimminnullu qinnuteqaqqissasut oqarfigineqarlutik. Taamatulli atorfeqarnermut atatillugu aningaasarsiassat suli isumaqatigiissutigineqarsimanngillat.
Peqqinnissamut Aqutsisoqarfimmit siuttut taamaammat aalajangerput, sioumoortumik akisarsisitsissallutik, akissarsiat pillugit isumaqatigiinninarnernik isumaqatigiissutaajumaartut naatsorsuutigisaminnik angissusilerlugit.
Ajornartorsiutaavorli, aningaasat akuersissutigineqarsimanngimmata, sulisitsisorlu, tassa Namminersorlutik Oqartussat, sulisunut allaanerusumik aningaasarsititsisoqartarneranik ilisimatinneqarsimanngimmat.
Peqqissutsimut Naalakkersuisoqarfiup suliamik ingerlatsinera ilaatigut nakorsat peqatigiiffiannit Peqqissaasullu Kattuffiannit sakkortuumik isornartorsiorneqarnikuuvoq.
Pisoq pillugu Peqqissutsimut naalakkersuisoqarfimmit ualimut oqaaseqartitsiniaraluaratta iluatsinngilarput, suliarli sulisunut ataasiakkaanut tunngasuunera pissutigalugu oqaaseqarsinnaannginnini, Peqqissutsimut Naalakkersuisoqarfiup pisortaata Ann Birkekær Kjeldsenip erseqqissaatigaa, Radioaviisimullu maannamut paasissutissiissutigineqartut assortunngilai:
- Oqaatigisinnaavara maleruagassat atuuttut aammalu pineqartut tusarniaaffigineqarnissaannik aalajangersakkat suliami malinneqarmata, aammalu Namminersorlutik Oqartussat suliap piaarnerpaamik naammassineqarnissaa kissaatigimmassuk, Peqqissutsimut naalakkersuisoqarfimmi pisortaq Ann Birkekær Kjeldsen oqarpoq.
