Peqqinnissaqarfimmiut ajunaarnersuaqarnerani iliuusissanik sungiusaqataasanngitsut
Nunatsinni upalungaarsimasut ajutoortoqaraangat erngerlutik annaassiniariartorlutillu sillimaffissanik nakkutilliiartuutigalutik naliliiartortarput.
Soorlu takornariartaassuarmi ajornartorsiornermik timmisartumilluunniit ajutoortoqarneranik kalerrisaarisoqaraangat taamaaliortarput. Taamammi pisoqaraangat inuit hunnorujulikkaat ulorianartorsiorataannaasarput.
Ulorianartorsiortunik annaassiniarnermi piffissaq aalajangiisuulluinnartarpoq. Taamaammat oqartussat ajunaarnersuaqarnerani iliuusissanik sungiusaallattaasarput, ajutoortoqarnissaanut sapinngisamik pitsaanerpaamik upalungaarsimanissaq qularnaaniarlugu.
Issittumi Sakkutooqarfiup upalungaarsimanermik sungiusaanermut ilinniartitsinermullu immikkoortortaata pisortaa, Michael Hjorth, taama oqarpoq.
- Ulorianartorsiorlutik ikiunasuarneqartariaqartut inuunerannik annaassiniarneq uani pineqarpoq. Upalungaarsimasuusugut tamatta ajunaarnersuaqarnerani qanoq iliornissamik sungiusimannittariaqarpugut. Qanormi iliornissamik paasiniaanissamut piffissaqartanngilagut.
Taamaakkaluartoq Peqqinnissaqarfimmeersut sungisaqatiserineqaraangamik peqataanissamut qujaannakkajupput.
Peqqinnissaqarfiup qullersaqarfia KNR-imut akissummini ilaatigut taama allappoq.
- Kalaallit Nunaata Peqqinissaqarfiani sulisut nakorsianik isumaginninnermik passussinermillu ukkassinneq salliutippaat. Sulisussaaleqineq taama aalajagernerminnut tunngavilersuutigaat.
Peqqinnissaqarfimmi sulisut amerlanerulertinnagit ajunaarnersuaqarnerani iliuusissanik sungiusarnernut peqataasalersinnaanngitsut, Peqqinnissaqarfiup qullersaqarfia ilisimatitsivoq.
Peqqinnissaqarfimmeersut peqataasannginnerat ugguutigigaat
Tassa Peqqissaqarfimmiut sulisussaaleqinertik peqqutigalugu ajunaarnersuaqarnerani iliuusissanik sungiusarnerni peqataasanngillat, kisianni Kalaallit Nunaanni Politiit sungiusarnerni taamaattuni pinngitsoornatik peqataasoqartarnissartik pingaartilluinnarpaat. Ajutoortoqassagaluarpammi sillimaffissanut tunngasuni pingaarutilinnik misilittagarsulersaramik.
- Ajutoortoqarnerani iliuusissatut pilersaarutivut misilittarusullugit sutigullu pitsanngorsagassaqarnerluta paaserusullutigu sungiusaqataasarpugut. Nunatsinni oqartussat assigiinngitsuneersuusugut sungiusaqatigiikkaangatta annaassiniaqatigiilluarnerullutalu attaveqaqatigiilluarnerusarpugut, Kalaallit Nunaanni Politiit pisortaannut tullersorti Katrine Sandgreen oqarpoq.
Kalaallit Nunaanni oqartussat assigiinngitsuneersut sungiusaqatigiittarnissaat pingaaruteqartoq, Issittumi Sakkutooqarfimmeersoq Michael Hjorth aamma isumaqarpoq. Peqqinnissaqarfimmi sulisut oqartussaneersut piginnaasaqarfiginngisaannik piginnaasaqartartut, taassuma ilaatigut aamma erseqqissaatigaa.
- Ajoqusersimasorpassuaqartitsisuusaarluni sungiusarnerni peqataagaangatta, ikiueqqaarfigisassanik tulleriiaarisariaqartarpugut. Tassa ikiortarialinni kikkut salliunneqassanersut kikkullu utaqqisinneqartariaqarnersut naliliisoqaqqaartariaqartarpoq. Uagullu naliliisinnaasanngilagut. Nakorsaanngilagummi. Peqqinnissaqarfimmeersunik sungiusaqataasoqartalertinnagu taamaaliorsinnaalernissatsinnut sungiusarsinnaannginnatta nalornilersarpugut. Tamanna uggornarpoq, Michael Hjorth oqarpoq.
Peqqinnisaqarfiup qullersaqarfia: Ulluinnarni suliavut sungiusaatigisarpavut
Nunatsinni ajutoortoqarneranik ukiuni kingullerni ataasiaannarnani kalerrisaarisoqarsimasoq, Peqqinnissaqarfiup qullersaa KNR-imut akissummini aamma allappoq. Pisunilu taakkunani suliatik siunissami assingusumik pisoqarpat iliuuserisinnaasaminnik misilittagarsorfigisimallugit aamma allappoq.
- Ukiuni kingullerni pisuni, soorlu coronavirusip tuniluunnerani, sarfaaruttoornerni aamma qarasaasiatigut saassunneqartaarnitsinni suliavut ajunaarnersuaqarnissaanut sillimanerunissamut sungiusaatigalugillu ilinniutigaavut. Peqqinnissaqarfimmi sulisut pisuni taakkunani tamani suleqataasimasut, Peqqinnissaqarfiup qullersaqarfia allappoq.
Issittumi Sakkutooqarfimmeersut aamma Kalaallit Nunaanni Politiit Peqqinnissaqarfimmeersut sungiusaqataasannginnerannik isorinninnianngillat, Peqqinnissaqarfimmeersulli ulluinnarni suliatik sungiusaatigiinnarnagit pisuusaartitsilluni sungiusarnerni peqataasalerpata pitsaassasoq isumaqarput.
- Sulisuvut taarseraattarput. Suleqatitaavut ajunaarnersuaqarnernissaanut aamma sillimaqqullugit sungiusarlutillu ilinniartassapput, Michael Hjorth oqarpoq.
Sulisutik aamma taarseraattarmata misilittagaqarluartut ikiliartortut, Kalaallit Nunaanni Politiit aamma erseqqissaapput. Taammaammat sungiusaqataarsarnissaat pingaartoq, taakku isumaqarput.
- Ajunaarnersuaqaraangat uivertoqalersarpoq. Uivertoqarneranik minnerpaaffissaaniititsinissamik sungiusartarpugut. Taamaalilluta annaassiniarnermi naammassisaqarluarnerulersarpugut. Taamaammat sungiusarnivut annaassatta amerlanerunissaannik qularnaarisuusinnaapput, Katrine Sandgreen oqarpoq.
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik nunatsinni upalungaarsimasoqarnermut akisussaasuuvoq.
Oqartussalli ataasiakkaat ajunaarnersuaqarnerani iliuusissanik pilersaarusiorsimanissaq namminneq akisussaaffigigaat, naalakkersuisoqarfik ilisimatitsivoq.
Nunap immikkoortuini immikkoortortatik tamarmik ajunaarnersuaqarnerani iliuusissanik pilersaarusiortareersut, Peqqinnissaqarfiup qullersaqarfiata pisortaa, Tina Amondsen, KNR-imut oqarpoq. Taakkuali sungiusarneqartarnersut sungiusarneqartannginnersulluunniit paasinngilarput.
