Peqqinnissaqarfimmi sulisut pikkorissartinneqarnissaat IA-mit siunnersuutigineqarpoq

- Peqqissaavinni sulisut ilinniarsimasut, taakkuupput inunnik attaveqartuarnermikkut ulluinnarni oqaloqateqarsinnaasut sullissisinnaasullu, angajoqqaanullu siunnersuisinnaasariaqartut, Inuit Ataqatigiit Peqqissutsimut tunngasuni oqaaseqartartuat, Olga Poulsen Berthelsen oqarpoq.

Meeqqat nunaqarfinni najugallit meeqqanut illoqarfinni najugalinnut sanilliullugit mamakujuttutornerupput, kigutilunnerullutik pujortaliaarnerusarlutillu pujortarnerusarput. Peqqissuserlu eqqarsaatigalugu equngassutillu aaqqiiviginiarneqarnerat pitsaanngilluinnarpoq, Meeqqat Inuusuttullu pillugit Ilisimasaqarfiup, MIPI-p, nalunaarusiaani saqqummeqqammersumi tamanna erseqqissarneqarpoq.

Angajoqqaalli akisussaassuseqannginnerunerat, sulisussaqannginneq imaluunniit paasititsiniaanikippallaartarnera ajornartorsiutinut pissutaanngitsoq, Olga Poulsen Berthelsen oqarpoq.

- Peqqinnissamik ilinniagallit sulisorineqartut pikkorissarneqarnerisigut ilinniaqqinnernillu suliniuteqarnikkut angusaqarluartoqarsinnaavoq, soorlu peqqinnissamut assistentit peqqinnissamullu ikiortit nunaqarfinniittut eqqarsaatigalugit, toqqaannartumik sullissaminnut pikkorinnerulerniassammata.

Meeqqat peqqissusaannik misissuineq pisussaaffiusoq, nunaqarfinniluunniit ingerlanneqarneq ajornerarlugu, MIPI nalunaarusiamini inerniliivoq.