Peqqinnissaqarfimmi sulisut akissarsiassaat isumaqatigiissutigineqarput
Taama Peqqinnissaq Pillugu Kattuffinni siulittaasoq Inuuti Fleischer oqaluttuarpoq. Taassumalu isumaqatigiissutit ukioq manna apriilip aallaqqaataaniit 2016-mi marsip 16-iani tungaanut atuuttussaq kattuffiit tamarmiullutik akuersaarmatigit nuannaarutigaa.
Isumaqatigiissut malillugu peqqinnissaqarfimmi sulisut akissarsiaat ukiut sisamat ingerlanerini 4,81 procentinik qaffakkiartuaarneqassapput.
- Angusaq pitsaviunngikkaluarpoq, nunatsinnili inuiaqatigiinni aningaasakilliornerup akuersaartittariaqarsimavaatigut, Inuuti Fleischer oqarpoq nangillunilu:
- Inuiaqatigiit peqqinnissaqarfillu inuiaqatigiinnik artukkiinngitsut anguniarnerini kattuffitta ilaasortattallu kivitseqataarusunneri uani taarusuppakka. Inuuti Fleischer oqarpoq.
Namminersorlutilli Oqartussat ilaatigut atukkat pitsanngorsarneqarnerisigut, sulisut ilinniarsimasut uninngaatiinnarnissaanut piumassuseqartariaqartut, Inuuti Fleischer nangilluni allappppoq.
Aamma peqqinnissaqarfimmi ilinniartutut naammassisut inuusuttut amerlanerit pisariaqarnerarpai, peqqinnissaqarfimmimi sulisut utoqqaliartortut amerliartuinnartussaammata, inuusuttullu aqqutigalugit siunissami peqqinnissaqarfik nunaqavissunik sulisoqarnerusoq taamaasiornikkut anguneqarsinnaammat.
Nakorsanut isumaqatigiissusiaq apriilip aallaqqaataa 2011-miit marsip 31-anni 2015-ip tungaanut atuuttussaq Nakorsat Peqatigiiffiat Namminersorlutillu Oqartussat ippassaq aaamma isumaqatigiissutigaat. Aningaasarsiat katillugit procentinik tallimanik qaffaavigineqassapput.
Nakorsanulli isumaqatigiissusiaq nakorsanut tunuliaqutaasunit akuerineqaqqaartariaqassasoq, Namminersorlutik oqartussat isumaqatigiinniartartuat Rasmus Sembach Olsen, Nakorsallu Peqatigiiffiani siulittaasunngorlaaq, Ole Lind ataatsimoorussamik tusagassiuutinut nalunaarumminni allagaqarput.
Isumaqatigiissut pillugu Radioavisimiit paasiniaagatta, tapiissutissat nakorsanut qullersaanut siumoortumik poorskinngitsiartoq tunniunneqarmata, Peqqissutsimut Qullersaqarfimmi sulisut pingasut suliunnaarallartinneqarneranik kinguneqartut, isumaqatigiissummi ilaapput.
