Peqqinnissaqarfik politiillu internetip attaveerunneranit eqqugaasimanngitsut
Sapaatiummat Nuna tamaat akunnerni pingasuni internetimut attaveeruppoq. Kinguneranik Nunap iluani nunarsuullu sinneranut internetikkut attaveqartoqarsinnaanani.
Allattoq Jaaku Lyberth
oktobarip 17-at 2017 11:29
Internetip sapaatiummat attaveerunnerani suliffeqarfiit pinngitsoorneqarsinnaanngitsut, tassa politiit napparsimmaviillu, sulinertik allanngortingaarnagu iluminni attaveqaatit atuinnarlugit sulisinnaasimapput.
Akunnerni pingasuni interneteqannginneq politiit sulinerannut aporfiusimanngilaq, tassami Nunatsinni politiit oqarasuaatit, pappilissat allaatillu atorlugit attaveqatigiissimapput. Taamaammallu interneteqannginneq politiit sulineranni annerusumik malugineqarsimanngitsoq politiini pigaartuuneq oqarpoq.
Sapaatiummat akunnerni pingasuni attaveerunneq sumerpiaq pissuteqarnersoq TELE-POST-ip misissuleruttorpaa nalilersuleruttorlugulu. Attaveerunneq Danmarkikkut attaveqaatinit aallaaveqartoq oqaatigineqarpoq.
