Mimi Karlsen coronamik aamma tunillatsittoq
Naalakkersuisumik allamik coronamik tunillatsissimasumik aamma imminut mattusimasoqalerpoq. Tamatumuuna peqqissutsimut naalakkersuisuugallartoq, Mimi Karlsen (IA) tunillatsippoq.
- Pilluaqqusisorpassuarnut qujanaq, tuppallerteqaassinga. Ajoraluartumik coronalerama 31-jan tungaanut angerlarsimaannassaanga, Mimi Karlsen Facebookimi quppernermini ippassaq allappoq
Mimi Karlsenip Pele Brobergillu (Naleraq) peqqissutsimut naalakkersuisoqarfik marluullutik paarlattaaffigaat. Taanna qanittumi aamma coronamik tunillatseqqasimavoq.
- Peqqinnissamut naalakkersuisoqarfimmik tiguseqqammerlunga coronamik eqqugaavunga. Aamma napparsimallunga sulinngiffeqarpunga. Tassa ima paasilluni siniffimmi innangaannarpunga, taamaalilluni Mimi coronamik akiuiniarnermi akisussaaffiup ilaanik tigusivoq. Taamaammat taanna tusagassiuutitigut aamma saqqummertarpoq, Pele Broberg KNR-imut sisamanngormat oqarpoq.
- Sulilluarnissamut maanna piareerpunga. Assersuutigalugu Mimi napparsimalissagaluarpat taava uagut akornatsinni ulluinnarni ataqatigiissaarissaagut, taamaalilluta qaquguluunniit uanga paarlaasinnaanissara qulakkeerlugu.
Kirsten Fencker napparsimalluni sulinngiffeqartoq
Peqqissutsimut naalakkersuisup, Kirsten Fenckerip (Naleraq) januaarip ulluisa qulinganiilli uippakajaarnini pissutigalugu sulinngiffeqarnera pissutigalugu Mimi Karlsenip Pele Brobergillu peqqinnissamut naalakkersuisoqarfik paarlattaaffigaat.
Naalakkersuisut siulittaasuata, Múte B. Egedep (IA) coronamik tunillatsissimanini ullut qulit matuma siorna paasivaa. Tamatuma kingunitsianngua nakorsaaneq, Henrik L. Hansen aamma tunillatsippoq.
Taamaalilluni corona pillugu tusagassiortunik katersortitsisoqarnerani saqqummertartut tamarmiik – nunatsinni allarpassuit assigalugit coronamik tunillatsinnikuusimalerput.
Killilersuutit pillugit tusagassiortunik katersortitsineq
Nunatsinni tunillatsissittut amerlangaatsiarput. Imalu amerlatigaat allaat misissuinermut periuseq sapaatit akunneri marluk kingulliit ingerlaneranni allanngortinneqangaatsiarluni.
Napparsimaruluttut maanna kisimik PCR-imik misissortissinnaapput. Allat sinneri peqqisseqqinnissami tungaanut angerlarsimaannassapput – aammalu imminnut peqqissisutut nalunaarutigisassallutik. Misissuisarfiit napparsimmaviillu tunillatsissimasorpassuit pissutigalugit ilungersornerat pissutigalugu taama periuseqartoqalerpoq.
Taamaalilluni nunatsinni coronamik tuniluuttoqarnerani kikkut tamarmik misissorneqartarnissaat periarfissaajunnarpoq. Inuillu PCR-imik misissortinngikkunik, napparsimavimmiinngikkunik nakorsiartarfimmiinngikkunillu tunillatsissimasut qanoq amerlatiginerat ilisimaneqarnavianngilaq.
Illoqarfinni killilersuuterpassuaqarput – taakkulu ilaat aqagu januaarip ulluisa 25-anni atorunnaartussaavoq: Tassa neriniartarfiit imerniartarfiillu unnukkut qulinut matoqqusaanerat.
Naalakkersuisut ullumi aqaguluunniit tusagassiortunik katersortitsisoqarniarunarpoq. Naalakkersuisuniilli kina saqqummiissanersoq suli nalunaarutigineqanngilaq.
