Peqqinnanngitsunik nerisaqarneq Inuit akornanni atugaavoq
Nunavummi Nunavimmilu naggueqatigiit Inuit 2.500-nit amerlanerit sunik nerisarnersut, qanoq neritigisarnersut aamma sooq taamaaliortarnersut ilisimatuut 40-t paasiniarsimavaat. Akissutaallu ernumanartortaqarput.
Montrealimi Ilisimatusarfimmi McGillimi ukiuni marlunni ilisimatusarneq maanna naammassivoq, paasisallu imaapput, naggueqatigiit Inuit quliugaangata taakkunannga arfinillit naammatsillutik nerineq ajortut imaluunniit peqqinnanngitsunik nerisaqartarlutik. Misissuinerillu naapertorlugit pissutaasut tassaapput piitsuuneq, minnerunngitsumillu inuunermi pissutsit qangali ileqquusut allanngortinneqarsimammata. Ikittuaraannaammi massakkut piniariartarput.
Naggueqatigiit Inuit aningaasaateqarpiannginnertik pissutigalugu naammattunik nerisassaqanngillat. Pisiniarfinni pisiassat Canadap kujasissortaanut naleqqiullugit akisunerujussuupput, taamaammat naatsiiat panertut sodavandillu pisiarineqarnerusarput. Nunaqarfinnilu mikinerni naatitanik assigisaannillu pisiniarneq ajornavittarpoq, tamakku akisoorujussuummata.
Misissuinerup inernerini siorna takuneqarsinnaavoq meeqqat tallimat inorlugit ukiullit quliugaangata taakkunannga arfineq-marluk ullormut pingasoriarlutik nerisinnaasanngitsut, angerlarsimaffianni naammattunik nerisassaqanngimmat.
Kingunipiluit amerlasoorujussuupput. Nerisassaqannginneq nerisalunnerluunniit sukkornermik, uummallunnermik, uisarusernermik, oqaatigilluaannarlugu peqqinnginnermik kinguneqarsinnaavoq. Canadamilu indianerit najugaqarfiini tamanna ersarissorujussuuvoq.
