Peqqarniisaarnianik paasisimasallit ullumi katersuupput
Oslomi tallimanngormat qaartartumeerilluni peqqarniisaartoqarnerata kingorna, Europami qisuariarnerit tamarmik assigiipput, islamisiortut sorsukkumatuut pasineqalerlutik. Islamisiortulli saassussinngillat, tassami saassussisuuvoq norskeq nunaminik pingaartitsisoq kristumioq. Tamannalu eqqarsalersitsivoq.
Peqqarniisaarnianik paasisimasallit, Bruxellesimi ullaaq ataatsimiillutik aallartittut, Norgemi pisut apeqqutinik arlalinnik eqqarsalersitsipput.
Pinerliineq ingasaassilluni talerperliunianit suliarineqartartoq eqqarsaatigalugu, EU-mi nunanit tamassuma pinngitsoortinneqarnissaa eqqarsaatigeqqinneqartariaqannginnerpa?
Anders Breivikip Europami attaveqarfeqarluni oqarmat apeqqut tamanna saqqumilaalerpoq.
Paasisimasallit eqqartugassaasa ilagaat, talerperliunerusut ingasaassiniat nakkutigineqarnerulissanersut. Internettimi oqallittarfinni arlalinni, Anders Breivik oqalliseqataasarsimavoq, apeqquserneqarporlu peqqarniisaarnera pinngitsoortinneqarsinnaasimanersoq internetikkut oqallinnerit nakkutigineqarnerusimasuuppata.
Apeqqutit amerlaqaat, paasisimasallit nunanit 27-ineersut Bruxellesimi ataatsimiittut akisinnaasaannit amerlanerit.
Ullumilu ataatsimiinneq Norgemi peqqarniisaartoqarneranit apeqquterpassuarnut akissutissiisussaanngilaq, EU-mi nunat Europami peqqarniisaarniartoqarsinnaanerannik paasinninnerannik allanngortitsinissamut ataatsimeeqartigiinneq aallarniutaassalluni.
