Peqatigiiffiit naalagaaffiup angajoqqaanik nalileeriaasitaarnissamut aningaasaliineranut: Aallartiffiuvoq

Danmarkimi kalaallit meerartaannik allamut inissiisarneq sivitsortumik oqallisaavoq.

Danmarkimi kalaallit angajoqqaat oqaasii kulturiallu eqqarsaatiginagit apersorneqartarnerat allanngortussanngorpoq.

Naalagaaffimmi 7,8 millionit koruuninik Danmarkimi kalaallit meerartaannik allamut inissiinissamik naliliiniarnermi angajoqqaat oqaasii kulturiallu eqqarsaatigalugit apersorneqartalernissaannut illikartitsivoq.

Kiisami taamaaliortoq, peqatigiiffiup Mentor Immanuelip Danmarkimi kalaallinik ikiuuffiusuusup siulittaasua isumaqarpoq.

- Taamaaliornissaa sivisuumik suaartaatiginikuuarput, Karen Banke oqarpoq.

Aningaasat taakku aallartissutaasinnaasut aningaasalli merlanerusut pisariaqartinneqalerumaartut, taanna isumaqarpoq.

- Siumukarneruvoq. Susaarnermit ajunnginneroqaaq, aningaasalli taakku naammassorinngilakka. Kalaallit angajoqqaat oqaasii eqqarsaatigalugit apersorneqartalernissaannut aallartissutaasinnaapput, Karen Banke KNR-imut oqarpoq.

Tamatumunnga kiisami aningaasaliisoqarnera, peqatigiiffiip Kalaallit Meerartaata aamma nuannaarutigaa.

- Aningaasarpaalunnik tamatumunnga illikartitsisoqarnera nuannaarutigeqaara. Danmarkimimi kalaallit ilaqutariit isumaginninnermi sullinneqarnerminni artorsaateqartortaqaalupput, peqatigiiffiup pisortaa Puk Draiby oqarpoq.

Siunnersorteqarlunilu paasissutissaliortoqassasoq

Aningaasat taakku angajoqqaat kalaallit oqaasii kulturiallu eqqarsaatigalugit tarnip pissusianik ilisimannittumit apersorneqartalernissaannut atorneqassapput.

Danmarkimi kalaallit Danmarkimi isumaginninnerup aaqqissuussaaneranut tunngasuni pisinnaatitaaffii pisussaaffiilu pillugit kalaallisut aamma paasissutissaliortoqassaaq.

- Pisinnaatitaaffii pillugit paasissutissaliortoqartussanngornera pitsaasuusoraara. Paasissutissaliat ilaqutaajumaartut qularinngilara, Karen Banke oqarpoq. Paasissutissaliortulli suliamik imarisaannik ilisimasaqarnissaat pingaartoq, taassuma erseqqissaatigaa.

Peqatigiiffik Kalaallit Meerartaat kalaallit oqaasiinik kulturiannillu ilisimasaqarluartunik Danmarkimilu kommunini isumaginninnermik sulialinnut meeqqamik allamut inissiinissamik naliliiniarnermi siunnersortissanik siunnersuisartoqatigiilioqataassaaq.

- Kommunit siunnersuisartoqartigeeqarnitsinnik paasitillugillu kalaallinik ilaqutariinnik isumaginninnermi sullissitillutik siunnersorneqarnissamik pisariaqartitsinerminni attaviginnittarnissaat qularnaassavarput. Taamaasilluta ilaqutariinnik sullissinerup suleqateqarnerullu sapinngisamik pitsaasuunissaa qularnaarsinnaassagatigu. Tamannalu sapinngilarput, Puk Draiby oqarpoq.

Oqalutseqarnissap qularnaarneqannginnera uggorigaa

Danmarkimi kommunit ilaqutariit kalaallit isumaginninnermi sullitatik oqalutseqarnissaannik neqeroortussaapput.

Danmarkimi kalaallit angajoqqaat danskisuullaqqissuunerarneqarnertik peqqutigalugu isumaginninnermi sullinneqartillutik oqalutseqarnissamik neqeroorfigineqarsimanngitsortaqartut, siusinnerusukkut oqaluttuaraarput.

Taamaammat oqalutseqarnissaasa aningaasaliinermi qularnaarneqannginnera, Puk Draibyp aamma uggoraa.

- Oqalutseqarnissamik pisariaqartitsisut amerlapput. Oqalutseqartitsineq ilaqutariit qanoq pisoqarneranik paasisaqarnissaannik qularnaarisooqataasarpoq. Oqalutseqarnissap qularnaarneqannginnera uggornarpoq, taanna oqarpoq.

Kommunilli oqalutseqarnissamik neqeroortarnissaat, peqatigiiffiup Kalaallit Meerartaata siunnersuisartoqatigeeqarnermigut qularnaartarniarpaa.

- Oqaatsit aporfiusartut siunnersuisoqartoqatigeeqarnitsigut erseqqissaatigisassavarput. Oqalutseqarnissamik neqeroortassasut inatsimmi allaqqavoq. Taamaasilluta kommunit oqalutseqarnissamik neqeroortarnissaannut kimigiiserfigisinnaanngussavagut.