Pentagonip umiarsuup naalagaa soraarsikkaa
USA-p illersornissaqarfiata Pentagonip sakkutuut umiarsuaanni "USS Theodore Roosevelt"-imi naalagaq coronavirusimut isorinnilluni allagai pillugit soraarsippaa.
Sakkutuut umiarsuaanni timmisartunit miffigineqarsinnaasumi, USS Theodore Rooseveltimi inuttat coronavirusimik tunillanneqareersullu umiarsuup naalagaa, Brett Crozier Pentagonimit suliunnaarsinneqarpoq. Sakkutuut umiarsuaanni inuttat 5000-it pallingajaqqavaat, naalakkallu coronavirusip umiarsuarmi siaruaannera pillugu attaveqatigiinnikkut kukkusimanera suliunnaarsinneqarneranut tunngavilersuutigineqarpoq.
- Crozier ajornartoorfiup nalaani naliliisinnaassuseqarsimanngilaq, amerikkami sakkutuut imarsiortut pillugit ministeriugallartoq Thomas Modley oqarpoq.
Umiarsuup naalagaata allakkat sisamanik qupperneqartut killisimaartunik allagaasut inuppaalussuarnut nassiunneqarsimavoq.
Naalakkap allagai tamanut siammarterneqareersullu umiarsuup naalagaata nualluut siaruatsaaliniarlugu nakkutigineqarsinnaanngornissaanut allagaqartoorsimavoq, suliunnaarsinneqarneranullu tamanna tunngaviusoq, ministerip oqaatigaa.
Nutaarsiassaqartitsivik Reuters naapertorlugu amerikkami sakkutooqarfinni coronavirusimik tunillanneqarsimasut pillugit paasissutissat Pentagonimit isertuunneqarsimassangatinneqarput.
Umiarsuaq timmisartunit miffigineqarsinnaasoq, Vietnammimi Da Nangimi sapaatit akunneri marluk tulaqqavoq.
Sakkutuut imarsiortut pillugit ministerip oqarnera naapertorlugu timmisartumi inuttat umiarsuarmiissimasut tunillaassuisimasinnaanissaat ilimatsaanneqartoq oqarpoq.
