Tusagassiuutit: Pele Brobergip Donald Trump oqaloqatigerusukkaa

Naleqqap siulittaasuata, Pele Brobergip qaaqquneqassagaluaruni USA-mukarluni Donald Trump oqaloqatigisinnaallugu DR-imit apersorneqarnermini oqaatigaa.

- Trumpimut attuumassuteqanngilaq. Amerikamiut aqutsisoqarfianiittut arlaat oqaloqatiginissaat soorunami piareersimaffigaarput, Pele Broberg DR-imut oqarpoq.

- Aamma illuatungiliuttutut. Maanimi susoqartoq ilisimanngikkunikku taava eqqortumik tunngaveqartumik aalajangiisinnaanngillat, taanna oqarpoq.

Naalakkersuisut siulittaasuat, Jens-Frederik Nielsen (D) Danmarkimut angalanermini Donald Trumpimik ataatsimeeqatiginnissinnaanersoq aperineqarami aamma itigartitsinngilaq.

Oqaaseqarnerilli taakku marluk Jens-Frederik Nielsenip amerikamiut aqutsisoqarfiannik ataatsimeeqatiginninnerit Namminersorneq pillugu Inatsimmi allassimasutulli, Danmarkip suleqatigineratigut pinissaannik isumaqarnera assigiinngissutigaat.

Pele Brobergilli naalakkersuisut namminersortumik iliuuseqannginnerat "naalakkersuinermik ingerlatsinermi nammineq aalajangiisinnaanngissuseqarnermik" tamanna taavaa.

USA-mik sioorasaarisoqannginneraraa

Naallu Donald Trump taassumalu aqutsisoqarfia "Kalaallit Nunaannik aqutsilerniarlutik atorsinnaasut tamaasa atorniarlugit" arlaleriarlutik oqaaseqarsimagaluartut sakkutuulersorsinnaanermillu mattussinianngikkaluartut, Pele Brobergip Donald Trump nunatsinnik tigusiliivinngissoralugu, DR-imut oqaatigaa.

- Kalaallit Nunaannik tiguaaliivinngilaq. Soorunami sakkutuunik takkuttoqangajalersutut oqaatigineqartartoq? Pele Broberg DR-imut oqarpoq.

Naleqqap siulittaasuata pingaartumik kalaallit politikerii danskillu tusagassiortui paasissutissanik tunngaveqanngitsumik annilaanganermik pilersitsisorai.

Taamaakkaluartorli Pele Brobergip amerikamiut præsidentiata oqaaseqaatai innuttaasut ilaannut aamma ernumatitsilersinnaasut DR-imut nassuerutigaa.