Pelép toquneratigut Brasiliami nuna tamakkerlugu ulluni pingasuni aliasunneqassasoq

Arsaattartup tusaamasap Pelép 82-inik ukioqarluni sisamanngornermi toqunerata kingorna, Brasiliami nuna tamakkerlugu ulluni pingasuni aliasunneqarnissaa, Brasiliami naalakkersuisut nalunaarutigaat.

Pelé innuttaasuulluarlunilu nunaminik asannittuulluni, sumiikkaluaraangamilu Brasilia nittarsaalluartaraa, Brasiliami præsidentiujunnaalersup Jair Bolsonarop oqaatigaa.

Bolsonarop præsidentitut kingoraartissaa Luiz Inacio Lula da Silva Brasiliami præsidentitut sapaatiuppat ivertinneqassaaq. Taanna Twitterikkut aamma allaaserisaqarpoq, Pelélu Brasiliap ilisimaneqarnerulernissaa pillugu iliuuseqarluartuunerarlugu.

Pelé, isikkamik arsaattartut nunarsuarmi pikkorinnerpaatut amerlasuunit isigineqarpoq. Taanna isikkamik arsaattartut akornanni kisiartaalluni nunani sinnerlugu nunarsuarmi pingasoriarluni pissartaavoq.

Pelé sivisuumik napparsimareerluni Brasiliami illoqarfissuarmi São Paolomi napparsimmavimmi ippassaq sisamannngornermi ualikkut toquvoq.

Inalugarsuamigut kræfteqarnini 2021-mi ukiakkut paasivaa, timillu atortuisa suliunnaarnerat pissutaalluni toqusoq nakorsat oqaatigaat.