PCB-mik piiaaneq akisoorujussuanngorsinnaavoq
Nuummi inissiarsuup blok Q-p siorna isaterneqartup PCB-qassusia pillugu inatsisartunut nassuiaammi, upernaaru saqqummiunneqartussami, inassutigineqassaaq, Nunatta sinnerani PCB-p qanoq atugaatigisimanera, qulaajarneqassasoq.
Kisianni Kalaallit Nunaanni misissueqqaarnerit, Asiap, illunik illorsuarnillu nalunaarsugaat tunngavigalugu, illut illorsuillu 5000-it pallillugit PCB-mik mingutsinneqarsimasinnaasut ilimagineqarpoq.
PCB-p 1977-mi inerteqqutaalernissaata tungaanut Danmarkimi sanaartornermi aamma atorneqarsimaqaaq. Kisianni aamma PCB illuni illorsuarnilu qanoq amerlatigisuni atugaasimanersoq ilisimaqqissaarneqanngilaq.
Naatsorsuutigineqarporli illut illorsuillu ½ procentiisa 5 procentiisalu akornanniittut PCB-mik mingutsinneqarsimasut. Ingeniøren taama qanittukkut allaaserisaqarpoq.
Aamma PCB-mik piiaaneq qanoq akeqassanersoq ilisimaqqissaarneqanngilaq. Missingiiniarnermili malittarikannerneqarsinnaasunik Danmarkimi sanaartorneq pillugu ilisimatusarfimmiit ilitsersuusiorsimapput.
Taakkua malikkaanni Danmarkimi PCB-mik mingutsitat piiarneri isumalluarnerpaagaanni 2,7 milliardit koruuneqarsinnaapput. Ajornerpaassappalli 81 milliardit koruuneqaratarsinnaapput.
Tassalu Danmarkimi misilittagaalersut nunatsinni aamma atuutissappata, PCB-mik piiaaneq Nunatsinnut akisoorujussuanngorsinnaavoq.
Taamaammat PCB-mik piaasoqarsinnaaneranik avatangiisinut naalakkersuisoq, Anthon Frederiksen aperineqarami mianersoqaaq.
- Tassami iliuusissat assigiinngitsut iluuserineqarsinnaapput. Kisianni Københavnip kommuniani iliuuserineqartartut assigiinngitsut tusarniaaffigisimavagut, suleriaqqinnissamut misilitakkat assigiinngitsut katersulereerpagut, avatangiisinut naalakkersuisoq oqarpoq.
Illunili PCB-mik piiaasoqassappat kia tamanna akilissaneraa, Anthon Frederiksen-ip maanna erseqqissumik akerusunngilaa:
- 1950-ikkunni, 1960-ikkunni aamma 1970-ikunni sanaartorneq amerlanerpaatigut danskit naalagaaffianit ingerlanneqarnikuuvoq. Kisianni akisussaassusermut aammalu kikkut akiliiumaarnissaannut tunngasut maanna imaaliinnarlugu oqaatigiuminaappoq.
