Passussinasuartarfik nutaaq atoqqaarfissiorneqarpoq
Mc-Kinney Møllerikkut passussinasuartarfissap sanaartorneqarnissaanut aningaasaliinerisa saniatigut qinnguartaatit inuup timaanut isertillugit misissuinermut atortorissaarutinut aningaasaliimmata Dronning Ingrid-ip Napparsimmavissuani passussinasuartarfittaaq nutaaliaalluinnartoq pilersinneqarpoq, tassanimi peruluttunut nakkutilliisarfik, sinittitaareerluni iteriartortarfik, pilattaasarfik, ulluinnarni passussisarfik kiisalu atortorissaarutinik ipeqanngerluinnartunik agguaassisarfimmik peqarluni.
- Mc-Kinney Møller-ikkut aningaasaliisimanerisa kingunerisaanik passussinasuartarfissamik sanaartortoqarsinnaammat Peqqinnissaqarfimmut qujanarluinnartuuvoq. Passussinasuartarfimmi nutaaliaalluinnartuummat nutaaliaaqisunillu atortorissaaruteqarluni napparsimasunik passussinerup pitsaanerulersissavaa pisariinnerulersissallugulu. Aamma qinnguartaatit inuup timaata iluanut atorneqarsinnaasut nutaaliaalluinnartut atorlugit pilattaanerit putuaraannaat atorlugit ingerlanneqarsinnaanngortippaat, passunneqartullu sukkanerusumik peqqissipallassinnaanngornerinik kinguneqassalluni, Peqqissutsimut Naalakkersuisoq tusagassiutinut nalunaarusiaminni taama ilaatigut allaaserisaqarpoq.
Aappariit Mc-Kinney Møller-ikkut aningaasaateqarfiata naalagaaffeqatigiinnerup iluani assigiinngitsutigut aningaasaliisarneri takornartarineqanngilaq. Thorshavn-imi Umiartortut Angerlarsimiffiat Christianshavnimilu Illu Atlantikumut aningaasarpassuarnik tapiissuteqartareermata.
- Aningaasaateqarfiup siunertaminut naapertuulluartunik aningaasaliisarpoq. Tassami nunat avannarlerni suliniutinut, nakorsaqarfinnut kiisalu inuiaqatigiinnut iluaqutaasussanut aningaasaliiuarpugut. Passussinasuarfissamullu aningaasaliissutissanik qinnuteqaat tigugatsigut tapersugassaqqissuunera qularisimanngilarput, Kalaallit Nunaatami innuttaasuinut iluaqutaasussaanera paatsuugassaanngimmat akoorusulersimavugut, ilami naalagaaffeqatigiinnerup iluani iluaqutaasinnaasut suulluunniit tapersersorusukkatsigit, aningaasaateqarfiup pisortaa Henrik Tvarnø knr.gl-imut taama oqarpoq.
