Partini siulittaasut qulit oqallinnissamut pisinnaajunnaarlutik nalunaartut
Partini siulittaasut qulit oqallinnissaannut pisinnaajunnaarlutik nalunaarput. Oqallinneq Christiansborgimi marlunngornermi unnukkut imaluunniit marlunngornerup unnuaani pisussaagaluarpoq, partiilli pisinnaajunnaarnerat pissutigalugu taamaatiinnarneqarpoq.
Tamanna TV 2-mit Ritzauimut ilisimatitsissutigineqarpoq.
- Christiansborgimi ileqqoq malillugu partiit siuttuisa oqallinnissaannut partiit qulit pisinnaajunnaarnerat tusaatissatut tiguarput, TV 2 Newsimi aaqqissuisuuneq Anne Mette Svane Ritzauimut allakkatigut oqaaseqarpoq nangillunilu:
- Danskit qinersinermi angusat naalakkersuisunngortitsinissarlu paasisaqarfiginiarlugit qineqqusaarnerit sivisuut naggataatungaanni oqallinnerit malinnaavigisarpaat. Taamaattumik partiit piffissaq kingullerpaaq atorlugu pisinnaajunnaarnerat pissutigalugu ileqqoq allanngorpoq, taanna allappoq.
Socialdemokratiet, Venstre, SF, Danmarksdemokraterne, Liberal Alliance, Det Konservative Folkeparti, Enhedslisten, De Radikale, Dansk Folkeparti aamma Alternativet pisinnaajunnaarlutik nalunaarput.
Moderaterne aamma Borgernes Parti peqataasussatut kiserngorupput.
Pingasunngornerup ullaap tungaani oqallinneq
Moderaternemi siulittaasoq Lars Løkke Rasmussen qinersinerup inernera aalajangerneqareerpat TV 2-mi DR-imilu partiit siulittaasuisa unnugu unnuarulu oqallinneranni peqataanissamut pilersaaruteqarsimanngitsoq, Moderaterne ilisimatitsivoq. Tamanna partiip Ritzauimut ilisimatitsissutigaa.
Ritzauip Borgernes Parti oqaaseqartinniarsaraa.
Danmarksdemokraternep tusagassiornermut pisortaata partiit qulit sinnerlugit pisinnaajunnaarnerisa mailikkut nalunaarutiginninnera TV 2-mi marlunngornermi siusinnerusukkut allaaserineqarpoq.
- Publicistklubbenimi partiit siulittaasuinik pingasunngornermi ullaap tungaani oqallitsitsinissaq pilersaarutigineqareermat, marlunngornerup unnuaani oqallitsitsisoqaqqinnissaa pisariaqarsorinngilarput, tusagassiornermut pisortaq TV 2-mut allappoq.
Publicistklubbenimi oqallinnerup pingasunngornermi nalunaaqutaq aqqanermut aallakaatinneqarnissaa suli pilersaarutaasoq, tusagassiivik Ritzauimut uppernarsaavoq.
DR-ip ministeriuneq Mette Frederiksen (S) sooq partiit siuttui qinersiviup unnukkuani oqallinnissamut peqataajumannginnersut marlunngornermi ullaakkut aperaa.
- Tamanna suleqaterpassuannit akissutissarsereersimassajunnarsivat. Qineqqusaarnermi matumani piffissarujussuaq atorlugu oqallippugut, qineqqusaarnerpullu ingerlalluartorujussuuvoq, taanna oqarpoq.
/ritzau/
