Partii ikorfartorti nuannaartoq: Inuussutissalerinermut tunngasut akisussaaffigilerutsigit eqqortuussaaq
Inuit Ataqatigiit Nalerarlu Danmarkip oqartussaaffigisaanik tigusinissarput sulissutigilersaaraat, partiip Naalakkersuisoqatigiinnut ikorfartortip, Atassutip, nuannaarutigaa.
Nunattami inuussutissalerinermut tunngasut kisermaallugit akisussaaffigilernissaat qinigaaffimmi uani sulissutiginiaritsik, partiit marluk, IA Nalerarlu, naalakkersuisoqatigiinnissamut isumaqatigiissuumminni allapput.
- Nuannaarutigeqaarput. Siunnersuuterpummiuna, Atassutip siulittaasua Aqqalu Jerimiassen oqarpoq.
Uumasut nakorsaqarnermut inuussutissalerinermullu tunngasut akisussaaffigilissagivut Atassutip Inatsisartut 2019-imi ukiakkut ataatsimiinneranni siunnersuutigigaa, taanna oqarpoq. Siunnersuutaa Inatsisartut akueraat, sulili misissuisitsinatik. Corona peqqutigalugu killilersuinerit tamatumunnga peqqutaanerarpaat.
Aalisarnermut, Piniarnermut Nunalerinermullu taamani Naalakkersuisoq, Jens Immanuelsen, Atassummut siorna decembarimi akissummini taama allappoq.
Savalimmiut ilinniarfigissavagut
Nunatta oqartussaaffik taanna tiguniarlugu Savalimmiut isumassarsiviginiarlugillu ilinniarfigisariaqaraat, Aqqalu Jerimiassen isumaqarpoq.
- Savalimmiut oqartussaaffik inuussutissalerinermut uumasullu nakorsaqarnermut tunngasut tigoreerpaat. Tamannalu isaatitsissutigilluartaqaat, Aqqalu Jerimiassen oqarpoq.
Savalimmiut kapisilinnik tukertitsiveqarnikkut isaatitsisartut, taanna oqarpoq.
- Oqartussaaffik inuussutissalerinermut tunngasoq tigunikuugamikku kapisilinnik avammut tunisinikkut isaatitsinermut namminneq malittarisassaliorsinnaapput. Tamannalu ilinniarfigissavarput. Tamanna eqqarsaatigiuaannartariaqarparput. Nunatta tamanna qanoq isaatitsissutigisinnaavaa? Tamanna nunatta karsianut isaatitsissutaasinnaavoq, Aqqalu Jerimiassen oqarpoq.
Akisussaaffik avinnikuugaat
Akisussaaffik taanna Namminersorlutik Oqartussat danskillu avatangiisinut inuussutissalerinermullu ministereqarfiata avinnikuuaat. Tassa nunatsinni uumasut nakorsaqarnermut inuussutissalerinermullu tunngasut ilarpaalui Danmarkip oqartussaaffigai.
Nunatsinni uumasut nakorsaqarnermut inuussutissalerinermullu akisussaaffik:
Akisussaaffik taanna Namminersorlutik Oqartussat danskillu avatangiisinut inuussutissalerinermullu ministereqarfiata avinnikuuaat.
Inuussutissalerinermut tunngasut ima agguataagaapput:
Danmarkimi: Inuussutissat pillugit aqutsisoqarfik neqinik nioqqutissiorfinnut aalisakkerivinnullu taavalu aalisariutinut tunisassiorfiusunut avammut tunisisartunut akuersissuteqarlunilu taakkunani nakkutilliisarpoq.
Kalaallit Nunaanni: Uumasunut Nakorsaqarfik Inuussutissalerinermullu Oqartussaaffik nunatsinni nioqqutissanik inuussutissaleriffinnut akuersissuteqarlunilu taakkunani siunnersuillunilu nakkutilliisarpoq.
Tusarfiit: Naalakkersuisit Inuussutissallu pillugit Danmarkimi aqutsisoqarfik
Assersuutigalugu nunatsinni aalisakkerivinnut avammut tunisisartunut tunngasut.
Aaqqissuussinerlu massakkut atuuttoq ajornartorsiutaasoq, Aqqalu Jerimiassen oqarpoq.
- Kulturitsinnut naleqqutinngilluinnartumik killilersuisoqarujussuarnera ajornartorsiutaavoq, Aqqalu Jerimiassen oqarpoq.
Kalaalimineerniarfinnilu nioqqutaaqqusaanngitsunik atorluaanerunissatsinnut aamma periarfissarsiornerusariaqarsorivaatigut.
- Nunatta piinik atorluaanerorusuppugut, taanna oqarpoq.
Tunngavilersorluakkamik aalajangiisariaqartut
Oqartussaaffiup tigunissaanut periarfissanik misissuisitsisoqartariaqarluinnartoq, siulittaasoq oqarpoq.
Taannami nunatsinni politikerit inuussutissalerinermut uumasullu nakorsaqarnermut tunngasut akisussaaffigilernissaat pillugu tunngavilersorluakkamik aalajangernissaannut qulakkeerutaasinnaavoq.
Oqartussaaffimmillu taassuminnga tigusineq qanoq aningaasartuuteqarfiutigissanersoq misissuisitsinikkut paasiniarneqassasoq, Atassutip 2019-imi siunnersuummini aamma kissaatigaa.
Naalakkersuisut oqartussaaffimmik taassuminnga tigusineq 20-25 millionit koruunit missaannik aningaasartuuteqarfiussangatikkItsik, siunnersuut Inatsisartut 2019-imi ukiakkut ataatsimiinneranni oqaluuserineqarmat ilisimatitsipput. Tamatumunngali aningaasartuutissanik naatsorsueqqittoqartariaqartoq, Naalakkersuisut 2019-imi ilisimatitsipput.
Oqartussaaffik taanna nunatta tigussappagu, tamanna sulisoqarnikkut qanoq piumasaqaatitaqassanersoq, siulittaasup oqaatigerusunngikkallarpaa.
- Tamanna misissuisitsinermi paasisani erserumaarpoq, taanna oqarpoq.
