Partiit tamarmik suliffissaaleqisut iliuuseqarfigerusuppaat
Naalakkersuisoqatigiinni partiit marluk nunatsinni suliffissaaleqinerup akiorniarneqarnissaannut Naalakkersuisut pilersaarutaannik saqqummiusseqqullugit piumasaqarput.
Naalakkersuisoqatigiit partiiannit siunnersuut illutungiliuttut partiiannit tapersersorneqarpoq. Inuit Ataqatigiit aamma Partii Naleraq aamma Partii Inuit siunnersuutigineqartumut isumaqataapput.
Sanaartugassanut iluarsagassanullu aningaasaqarfimmi aningasat uninngaannartut atorlugit suliffissaaleqineq akiorniarneqassassasoq Siumut Atassullu siunnersuuteqarput.
- Suliffissaaleqisut sulilersinneqarsinnaapput, siunnersuuteqartut tunngavilersuutiminni taama allapput.
Nunaqarfinni suliffissanik pilersitsinissaq siunertaralugu suliffissuarnut kiffartuussinermut isumaqatigiissusiornissaq siunertaralugu Naalakkersuisut aningaasanik immikkoortitsisariaqalersut siunnersuuteqartut allapput.
Aalisagartassat illersorneqarsinnaasumik amerlineqarnissaat siunnersuutigineqarpoq, suliffissanik pilersitsinissaq annertusarneqassammat.
Siumut aamma Atassut isumaqarput suliffissaaleqinerup akiorniarneqarnissaannut iliuusissat inuiaqatigiinnut annertuunik aningaasartuutaassasut - siunnersuuteqartut isumaat malillugu, allaffissornikkut atuiffiunissaa ilimagisariaqarmat iluaqutaasumik piffissamillu sivikitsummi anguneqassappat.
Pilersaarusiornermut aningaasartuutigisaq, innuttaaqatitta nunaqarfinni illoqarfinnilu najugaqartut sulilernissaat siunertaralugu ileqqaarutitut isigineqassaaq, siunnersuuteqartut taama allapput.
Inatsisartuni suleqatigiit nutaat tassalu Inuiat Ataqatigiit aamma Partii Inuit kiisalu Partii Naleraq peqatigiillutik inatsisartuni siunnersuummik ullumi saqqummiussissapput - taakkua naalakkersuisut partiivi assigalugit suliffissaaleqinerup akiorniarneqarnissaanut periussissamik erseqqissumik Naalakkersuisut saqqummiussinissaat piumasaraat.
Taakkuali siunnersuutaat naalakkersuisoqatigiit partiivisa siunnersuutaannit assigiinngissuteqalaarpoq.
Nunanit allanit suliartortunut sulisinnaanermut akuersissutinik tunniussisarnerup sukateriffigineqarnissaa, illuatungiliuttut partiivisa siunnersuutigaat. Tassani avataaniit suliartortartut pillugit akuersisarnerit allanngortinneqarnissasut, ullut 14-it qaangiunnerani tusagaqanngikkunik akuerineqartutut isigineqarnerat taarserlugu qaammammmik ataatsimik sivitsorneqassaaq, siunnersuulli taanna isumaqatigineqanngilaq.
Nuna tamakkerlugu akeqanngitsumik suliffissarsiortarfimmik qarasaasiakkut nittartakkakkut pilersitsinissaq Naalakkersuisut kissaatigineruaat taannalu 2015-ip aallartisimalernerani atulerumaartoq Naalakkersuisut neriorsuipput.
Nunatsinnut ilisimatusariarlutik tikittut akileraarutitigut piumasaqarfigisalernissaannut aqqissuussilluni aammalu/imaluunniit annertuumik, nunatsinnut aningaasartuutitaqanngitsumik, nunaqavissunik suleqateqarlutik ilinniarfinnillu pilersitsillutik ilinniarfiit attuumassutillit akuutinneratigut, illuatungiliuttut partiivisa siunnersuutigaat.
Naalakkersuisut siunnersuutigineqartumut isumaqataanngillat, taakkua innersuussutigaat Kalaallit Nunaat avatangiisitigut ilisimatuussutsikkut sulinermi nunat tamat peqataaffigissaanik Kalaallit Nunaat peqataasariaqarmat tamanna Kalaallit Nunaannut aamma kikkunut tamanut iluaqutaasussamik, naalakkersuisut taama allapput.
Suliffissaaleqinerup akiorniarneqarnissaanut inatsisartuni ullumi oqallittoqartussaavoq.
