Partiit siuttui saarullittassat pillugit aggersagaasut

Saarullittassat amerlineqarnissaat siunertaralugu partiit siulittaasui Naalakkersuisunit aggersarneqarput. Tamannalu pivoq KNAPK-p qinnuteqaateqarmat.

Partiit siulittaasuinik aggersaaqqullugu, Partii Naleqqap siulittaasua Hans Enoksenip kaammattuereersorlu, Naalakkersuisuugallartut siulittaasuat, Kim Kielsen, taama ilisimatitsivoq.

- Ippassaq aalajangersimavarput, partiit siuttuinut sapinngisamik piaarnerpaamik saqqummiutissallugu, Kim Kielsen oqarpoq.

Sinerissap qanittuani saarullinniarneq taamaatittoq Naalakkersuisuugallartut sapaatit akunnerata siuliani nalunaarutigaat.

Tamanna Partii Naleqqap siulittaasuata Hans Enoksenip nikuissutigaa. Taassuma piumasaraa, saarullittassat qaffanneqarniassammata partiit siulittaasui aggersarneqassasut.

Saarullittassallu amerlineqarnissaannik KNAPK-p kissaataa Naalakkersuisut naammasserusuppaat.

 - Qaffaanissamut tunngatillugu eqqartuivugut. KNAPK-p kissaataa taanna arlaatigut nalilersorsimavarput. Aamma assigiinngitsunut tusarniaasoqarsimavoq. Pappialat, Naalakkersuisut uagut tigusavut, tusarniaanermi akissuteqaataasimasut. tamakkua tamavimmik agguaanneqassapput. Taava partiit siuttui namminneq nalilersueqataasinnaassapput.

Kim Kielsenip aamma erseqqissarpaa, saarullittassanik amerlileeratarsinnaaneq qineqqusaanermut ilaassanngimmat:

- Pisasseeqqinniarneq imatut aamma paatsoorneqarsinnaavoq; qineqqusaarutaannartut. Taamaammat erseqqissaatigerusuppara, partiit siuttui oqaloqatigerusuppavut,  partiit akimorlugit qanoq arlaannik inerniliisinnaasannginnerluta, partiit tamattaalluta, Naalakkersuisuugallartut siulittaasuat, Kim Kielsen, oqarpoq.

Taanna aamma oqarpoq, saarullittassiissagunik, tamanna partiit siulittaasuinik ataatsimeeqateqareernermi nalunaarutigineqassasoq.