Partiit siulittaasui danskit eqqartuussivimmiittut
Dansk Folkepartip siulittaasua, Morten Messerschmidt, De Radikalellu siulittaasuat, Martin Lidegaard, marlunngornermi naapippata, avatangiisini sungiusimanngisaminni naapissapput.
Taakkua eqqartuussiviup Messerschmidtip Lidegaardimut suliassanngortitsinera Frederiksbergip eqqartuussiviani suliarilerpagu, apeqqutinut tamarmik marlunngornermi akissuteqassapput.
Messerschmidtip oqarnera naapertorlugu, Lidegaard Randersimi tamat oqartussaaqataanerata ulluanni ukioq kingulleq novembarip qulinganni politikkikkut oqallittoqarnerata nalaani, oqaatsinik nikanarsaataasunik oqaluppoq.
- Innuttaasut tusindilikkaat allamik upperisaqarnerat imaluunniit amiisaluunniit qalipaataat maani inimiittut amiannit allaanerunerat piinnarlugu parnaarullugit nunamit anisinneqarusupput, Martin Lidegaard oqallinnermi oqarpoq.
De Radikalet siulittaasuat Weekendavisenimi allaaserisaqarlunilu podcasteqarnerup kingorna taamatut oqaaseqarpoq, Messerschmidtip pinerluuteqarsimasut nunanit allaneersut nunanillu allaneersut nammineersinnaanngitsut Danmarkimit anisitaanissaat allaaserisami podcastimilu eqqartormagu.
Messerschmidtip Lidegaard oqallinnermi tamatuma saniatigut ima oqaaseqarsimanera pillugu eqqartuussivimmut suliassanngortippaa:
- Weekendavisenimi apersorneqarnerit eqqortumik paasisimassagukku danskit hundredetusindillit, inuiaqatigiinnit allaneersuuppata namminnerlu piumassutsiminnik aallarusunngippata, parnaarukkusuppatit, isumaqaravit aallartariaqartut.
Messerschmidtip Lidegaardip oqaatsit taakkua nikanarsaataanerannik, narrunarsaataanerannik eqqunngitsumillu oqaatigineqarsimanerannik nassuerutiginninnissaa piumasaraa.
Eqqartuussiviup isumaqataanissaa piumasarigaa
Suliaq pineqartoq tassaavoq pinerluttulerinermi inatsimmi narrunarsaaneq pillugu immikkoortoq, inuinnaallu pinerluttulerinermut tunngatillugu suliassanngortitaanni saqitsaassutigineqartoq eqqartuussisumit aalajangiiffigineqassaaq.
Assersuutigalugu unnerluussisoq - matumani tassaasoq Messerschmidt - akiligassiisoqarnissaanik aningaasatigullu taarsiiffigineqarnissaminik piumasaqarsinnaavoq.
Taannali taamaaliunngilaq.
- Eqqartuussiviup tamatuma ilumuunnginneranut isumaqataanissaa taamaallaat piumasaraara, Messerschmidt eqqartuussineq sioqqullugu oqarpoq:
- Lidegaardip oqaaseqaatiminik tunuartitsinissaa arlaleriarlunga siunnersuutigereerpara, allatullu iliuusissaarukkama oqaaseqaataani taakkunani piviusup eqqartuussivimmit nalilersorneqarnissaa piumasarisariaqarpara.
Ritzauip Lidegaard eqqartuussineq sioqqullugu apersorneqarsinnaanersoq De Radikalenut aamma apeqqutigaa, akinngillalli.
Lidegaard pinngitsuutinneqarusuttoq
Partiit siulittaasuisa eqqartuussissuserisuisa eqqartuussivimmi tunngavilersuutissatik piareersareersimavaat.
Allakkami DF-ip siulittaasuata eqqartuussissuserisuanit Carlo Siebertimit suliarineqartumi allaqqavoq, Lidegaardip Messerschmidtimut unnerluussutai "ajungaarmata“ "isummersinnaatitaanerup killinga qaangerneqartoq“.
- Eqqartuussivimmut suliassanngortitsisup (Messerschmidtip, aaqqiss.) inuit ammip qalipaataatigut allaanerussutillit, allamik upperisallit inuiaassutsikkulluunniit allaanerusumik tunuliaqutallit anisikkusunngilai.
- Suliassanngortitsisorli akerlianik isumaqarpoq, inuit ataasiakkaat amiisa qalipaataat, upperisaat inuiaassutsikkulluunniit allaanerusumik tunuliaquteqarnerat Danmarkimi najugaqarnissamut attuumassuteqanngitsut, eqqartuussissuserisoq allappoq.
Lidegaard pinngitsuutaarusuppoq, oqaatsillu nikanarsaataasimanerat ilumuunnginnerarpaa.
Taasuma eqqartuussissuserisuata, René Offersenip, Martin Lidegaardip "taakkua"-mik oqarnermini "taakkua, ersisaarinissamik toqqaasut" pisimagai, ilaatigut tunngavilersuutigaa:
- Tassa nunamit anisitseqqittarnissamik suliniutillit, taama suliniutillit ilaatigut tassaallutik Donald Trump, Alternative für Deutschland aamma Morten Messerschmidt, eqqartuussissuserisoq eqqartuussivimmut tunngavilersuutimini allappoq.
Martin Lidegaardip Weekendavisenimit apersuineq iluamik paasisimanerlugu tamatuma saniatigut nangaassutigaa, taanna oqarpoq.
Taamatullu oqarnera nikanarsaanerugaluarpalluunniit, oqaatsit eqqartuussissuserisup eqqortuusorai:
- Oqaatsit eqqartorneqartumut attuumassuteqarmata tunngavissaqarluarlunilu oqaatigimmagit, René Offersen allappoq isummersinnaatitaanermullu pisinnaatitaaffik aamma innersuussutigalugu.
Suliaq eqqartuussivimmi marlunngornermi suliarineqassaaq, eqqartuussulli sapaatit akunneri arlallit qaangiuppata tusarliunneqassangatinneqarpoq.
RITZAU
