Nunatsinni sumiiffinni tamani innutaasut qinersiartornerannit sapaatip akunnera qaangiuppoq.

Partiit qineqqusaarnerminni naalakkersuisoqatigiinnik siammasissunik ajornanngippallu piaartumik pisariaqartitsisoqartoq oqaatigaat. Taamaammat Inatsisartut qinersinermut inatsit allanngortinniarlugu qineqqusaarnerlu sapaatinit akunnernit arfinilinnit tallimanut sivikilliniarlugu aalajangerpaat.

Tamanna nunatta oqaluttuarisaanermi sillimaniarnikkut nunarsuarmilu politikkikkut inissisimaneranut pingaartumik tunngassuteqarpoq, tamannali kommunimut qineqqusaarnermut inissaqartitsinerunissamik aamma pissuteqarluni.

Qinersinerullu inernera ersarilluarpoq: Demokraatit pingasoriaammik siuariaateqarlutik, pingasunit qinigaatitaqarnermit qulinik qinigaatitaqalerlutik assortugassaanngitsumik ajugaapput. Taamaammallu maanna isumaqatigiinniarsinnaatitaallutik.

KNR-ip isumaqatigiinniarnerit qanoq ingerlanerat innuttaasullu naalakkersuisunngortussanik nutaanik paasisaqarnissamut qanoq sivisutigisumik utaqqissanerat paasiniarlugu partiit assigiinngitsut attaveqarfigai.

Nipaanneq

Isumaqatigiinniarnerit siulliit naammassereerput, aappassaanillu isumaqatigiinniartoqaleruttorluni. Demokraatit IA, Naleraq Siumullu aappassaanik isumaqatigiinniarfigereersimagai KNR-ip uppernarsartippaa.

Partiilli assigiinngitsut isumaqatigiinniarnerit pillugit oqaatigisinnaasaat annertunngillat. Demokraatit isumaqatigiinniarnermut qanoq siunnersuuteqarnersut arlaannaanilluunniit oqaatigiumaneqanngilaq.

Atassummit Aqqalu Jeremiassenip isumaqatigiinniarneq siulleq ingerlalluarsimasoq oqaatigaa.

- Kaffi siulleq mamaqaaq, kisianni aamma mamartuaannarpoq.

Kinguarsaaneq imaluunniit peqqissaarussineq

Partiilli naammagittarsinnaajunnaariartornerat paasineqapallassinnaavoq.

Partiit arlallit isumaqatigiinniarnerit qanoq sivisutigissanersut ilisimanagu KNR-imut oqaatigaat. Demokraatit kommunimut qinersisoqareernissaata tungaanut piaaralutik kinguarsaasinnaanerat arlallit ernumassutigaat.

Angulli isumaqatigiinniarnermi qitiusoq, Jens-Frederik Nielsen aperigaanni taama oqarneq eqqunnginnerarpaa.

Isumaqatigiinniarnissinni kinguarsaagunartusi kommunimullu qinersinerup qaangiunnissaa utaqqeqqaarlugu naalakkersuisoqatigiinnik pilersitsiniarunartusi oqaaseqartumik oqaloqateqarpunga. Qanoq tamanna oqaaseqarfigisinnaaviuk?

- Kinguarsaanngilagut. Immikkut illuinnartumiippugut, kisianni ingerlaneq torersumik suliarisariaqarput. Partiit tamaasa oqaloqatigaagut, naalakkersuisoqatigiinnik sapinngisamik siammasissunik pilersitserusuppugut. Ataatsimoornerup qanoq pingaaruteqarneranik tamatta oqaloqatigiinnissatsinnut piffissamik pisariaqartitsivugut, Jens-Frederik Nielsen oqarpoq.

Naalakkersuisoqatigiilertussatut ilimagineqartut

Ilisimatusarfimmit, Rasmus Leander Nielsenip kiisalu KNR-imi aaqqissuisup, Jens Thorip naalakkersusioqatigiit qanoq inissinneqarsinnaanerat sapaatip akunnerata siuliani eqqoriarpaat.

Naalakkersuisoqatigiit Demokraatinit, Inuit Ataqatigiinnit immaqalu Atassummit ilaqarsinnaanissaat taakku tamarmik nalilerpaat.

Partiilli katillugit ikinnerpaamik 16-inik qinigaatitaqassapput, Demokraatit Inuit Ataqatigiit suleqatigilersinnaanngikkunikkit IA-p Demokraatit avaqqullugit Siumut Nalerarlu naalakkersuisoqatigiinnik pilersitseqatigisinnaavai.