Partiit naalakkersuisooqatigiilernissamut piareersarput

KNR-TV-p paarlersuani unnuaq utaqqinitta nalaani oqaloqatigiinnerit siulliit, unnuap ingerlanerani eqqarsaatigilluarlureerlugit, partiitta siulersuisa ullumi tamanna eqqartorpaat. Siumukkullu isumaqatigiippugut attaveqatigiissalluta, tassami Siumut isumaqatigiinniarnernut siuttuusussaavoq

Partii Inuit siulittaasuata, Nikku Olsenip aamma oqaatigaa, Siumukkunnik naapitsigunik naalakkersuisooqatigiilersinnaanerminnullu atatllugu, suut pigaartinnerunerlugit sunillu piumasaqarumaarnerlutik maanna oqaatigisinnaanagu, kisiannili...

- Partiinik kikkunilluunniit mattussinngilagut, tassami partiit imminnut sullittussaanngillat inuiaqatigiilli pillugit sulisussaagatta, tassa tamakkuupput ilaatigut uangut pingaartippavut, tamannalu toqqammavigalugu isumaqatigiinniarnerit ingerlanneqassapput.

Partii Inuit siulittaasua, Nikku Olsen taama oqarpoq.

Atassutip siulittaasuata tulliata, Steen Lynge-p oqaatigaa, Siumukkunnik oqaloqatigiinnerit suli aallartinngitsut. Siumup siulittaasuata tusagassiortunik ullumi katersortitsinermi oqaatigaa, Atassutikkut siulliullugit oqaloqatigiinnissamut qaaqqusimallugit, tamannalu aqagu nlaunaaqutaq pingasunut pissasoq tusarliullugu.

Atassutip siulittaasuata tulliata, Steen Lynge-p, politikkikkut arlalitsigut Siumukkullu isumaqatigiinnertik suleqatigiilernissamut neriunaateqartutut oqaatigaa imalu nangilluni.

- Appasissumik akunnattumilluunniit isertitallit nammineq illuliorsinnaanerannut akissaqartuarnissaat aqqutissiuunneqartariaqarpoq. Imaluunniit ullumikkut periarfissaareersup annikinnerulinnginnissaa uangut Atassummit pingaartitaraarput, tassami inuit ataasiakkaat ileqqaarinissaat periarfissaqartikkusukkatsigut.

Steen Lynge-p aamma oqaatigaa Siumukkullu politikkikkut anguniakkatik assigiinngissuteqagaanngitsut, pingaartumik aatsitassarsiornissami suliffeqarfissuarnut akitsuusiinissamik eqqarsaatit pillugit.

- Atassuminngaanniit oqariartuutitta allaanerussutigilaaginnarpaa, aatsitassat anninneqartussat tamarluinnaasa, annertussusaat aallaavigalugit akileraasusersorneqarnissaat tamatigut atortinniannginnatigu, taamaattoq suliffeqarfissuit iluanaarutaanniit akileraarusiisarnissaq ammaffigaarput. Tassalu tamannarpiaavoq Siumukkullu isumaqatigiilluta oqaloqatigiissutigisinnaasagut.

Atassutip siulittaasuata tullia, Steen Lynge taama oqarpoq.