Partiinut tapiissutit Inatsisartunit avissaartinneqalerput

- Tamaalilluni partiinut tapiissuteqartarneq ersarinnerulissaaq.

Inatsisartut siullittaasorigallagaat Olga P. Berthelsen taama oqarpoq.

- Allannguinissamut siunertaavoq, aningaasat partiitut tapiissutigineqartartut Inatsisartut allattoqarfianiit avissaartinneqarnissaat, Olga P. Berthelsen oqarpoq.

Allannguinerup kinguneranik partiit siunnersortaat, Siulittaasoqarfimmit aningaasarsiaqatinneqaraluartut partiinit aningaasarsiaqartinneqalissapput.

Partiinut siunnersortit Siulittaasoqarfimmut attuumassuteqarunnaarlutik partiinit akisussaaffigineqalernerat Nunatta karsianut malunniuteqassanngilaq. Siulittaasoqarfimmut aningasaliissutit ilaat 3,145 millioni koruunit partiinut tapiissutinut nuunneqarput.

Allannguinerup aamma ilagaa, partiinut tapiissutit tunngaviusut marloriaatinngorlugit qaffanneqassammata, soorluttaaq partiit Inatsisartuni ilasortaatitaqarneri naapertorlugit tapiissutaasartut qaffanneqassasut.

- Partiinut tapiisarnermut inatsit allanngortariaqarpoq, partiit imminnut ingerlattuusariaqarmata. Partiit ingerlanneqarnerat Inatsisartut allattoqarfianiit akuleruffigineqarnani aningaasalersorneqarsinnaannginami, Olga P. Berthelsen oqarpoq.

Partiinut tapiissutut pillugit inatsisip allanngortinnerisigut, partiinut tapiissutit katillugik 8,5 millioni koruuniulissapput. Inatsisimmik ersarissaanerup aamma kinguneraa, partiit tamarmik tapiissutinik atuinertik pillugu ukiut tamaasa nassuiaasalissammata.