Partii pilersinneqaliivippoq
Partiip pilersinneqarnissaanut innuttaasunik atsiortitsinerit 920-it angulluinnarneqalerput. Atsiortitsinerit kingulliit 50-it missaaniittut Ilulissani ulluni makkunani ingerlanneqaleruttorput.
- Tassa pilersinnialerlugu nalunaaruteqarnitsinni oqaatiginikuuara oktobarimi naatsorsuutigalugu ataatsimeersuarneq ingerlatissagipput. Maannakkulli naatsorsuutigilerparput septembarip aallartisimalernerani ataatsimeersuarnissarput ingerlatissallugu, Nikku Olsen partiimik pilersitsiniarluni suliniuteqartoq oqarpoq.
Uuliasiornerup aatsitassarsiornerullu ukiuni makkunani pileruttorfianni inuiattut ineriartornermi immitsinnut salliutinnerunissatsinnut partii pingaartitsilluni suliniuteqarniartoq, Nikku Olsenip ilanngullugu oqaatigaa.
Partii pilersinniarlugu septembarip aallartisimalernerani ataatsimeersuartitsisoqassaaq.