Partii nutaarluinnaq Japanimi naalakkersuisuutitaqalisaaq
Japanimi ministeriuninngorlaap Yusio Hatoyamap qineqqusaarnermi neriorsuuterpassuami ilaminiinnanngui piviusunngortinniassagunigit ilapaangaatsiartussanngorpoq. Hatoyama uppernarsutsini atatiinnarniaruniuk qinigaaffimmini ulluni 100-ni siullerni suliniutinik tigussaasunik aallartitsisariaqarpoq.
Japani ukiuni 15-ini kingullerni aningaasarsiornikkut soriarsinnaajunnaartitaaqqavoq naalakkersuisuutitaqartullu naalakkersuinikkut aningaasarsiornikkullu pisariaqartinneqaraluartunik allanngortiterisinnaasimanatik.
Ippassarli qinersineq aamma akerliussutsimik takutitsineruvoq japanimilu demokratit partiiata anguniagai pillugit qinersisartut alarsimavaat partiitoqarlu qanganisarsiortoq pillarniarlugu taamaasiorlutik taamaammallu naalakkersuisuutitaqalersut qanoq annertutigisumik pisinnaatitaaffeqartinneqassanersut iluamik ilisimaneqarnani.
Partiip naalakkersuisuutitaqalersup meeqqat pisartagaqartinneqalernerisigut atuineq aallarteriarniarpaa, gymnasiami ilinniarnertuunngorniarneq akeerutsinniarlugu, nunalerinermi tapiissuteqartoqalersillugu, biilertarnerlu akikinninngortinniarlugu naak gassinik silaannarmik kissakkiartuinnartitsisunik naalakkersuisuusimasut anguniagaannit sakkortunerungaartumik imminut anguniagassissimagaluarluni.
CO2-mik aniatitsinerup 2020-imi 15%-imik millisinneqarsimanissaa naalakkersuisuusimasut anguniagarigaluarpaat, 1990-imili aniatitsineq aallaavigineqarmat milliliissutaasussaq 8%-iinnaagaluarpoq. CO2-mik naatsorsuutini killigitinneqartoq ullumikkornit 25%-imik annikinnerussasoq ministeriuninngorlaap neriorsuutaasa ilagaat.
