Partii Naleraq aningaasaqarnermut inatsimmut isumaqatigiinniarnermi peqataasiamanngillat
Tamanna aningaasaqarnermut naalakkersuisup Andreas Uldumip ajuusaarutigaa, akisussaaqataarusinnginnermillu ersiutaasoq oqarluni.
- Partii Naleraq isumaqatigiinniarnernut aggersarneqarsimagaluartoq uppernarsarsinnaavara. Kisianni taanna ilassisimanngilaat aamma aningaasanut inatsit pillugu isumaqatigiinniarnernut ilaasimanngillat, Andreas Uldum taama oqarpoq.
Aamma atuaruk Utoqqalinersiuteqalernissamut ukiorititat qaffanneqarnissaat Partii Naleqqap isumaqatiginngilaa
Aningaasanut inatsimmut isumaqatigiinninniarnernut Partii Naleraq junimi aggustillu naanerani aggersarneqaraluarpoq.
Radioaviisip Partii Naleqqami siulittaasoq, Hans Enoksen attavigigaluarpaa, taannali aasaq tamaat Nuummiissimannginnammi susoqaqqissaarsimanersoq oqaatigisinnaanagu oqarpoq, parteeqatiminullu innersuussilluni.
Partii Naleqqami aningaasanut oqaaseqartartoq Radioaviisip ullaap tungaani aamma pissarsiariniaraluarpaa, sulili iluatsinnagu.
Aningaasanullu inatsimmut isumaqatigiinninniarnerni peqataarusottoqannginnera Andreas Uldumip uggoraa.
- Oqaatigersuppara, peqataannginnerat ajuusaarnarmat uggornarmallu. Kisianni namminneerlutik soorunami akisussaaffigaat, Andreas Uldum oqarpoq.
Aamma atuaruk Aningaasanut inatsisissatut siunnersuut 2016 Partii Naleraq: Naalakkersuisut tutsuiginarnerat innarlerpoq
Aningaasanummi inatsit inatsisini pingaarnerpaatut taaneqarajuttarmat.
Taamaammallu partii qinersinermi kingullermi 3423-nit qinerneqartup isumaqatigiinninniarnernut ilaarusunnginnera, sunneeqataajumannginnermik, akisussaaqataarusunnginnermillu ersiutaasinnaasoq, Andreas Uldumip oqaatigaa.
- Tunngaviusumik akisussaaqataarusunnginnermik ersiutitut immaqa taaneqarsinnaavoq. Aamma sunneeqataasinnaanermik annikinnerusumik partii peqalertartoq, immaqa oqaatigineqarsinnaavoq, aningaasaqarnermut naalakkersuisoq Andreas Uldum oqarpoq.
Partii Naleqqamit oqaaseqartitsinisarsarivugut.
