Politikki

Aningaasanut inatsisissatut siunnersuut 2016 Partii Naleraq: Naalakkersuisut tutsuiginarnerat innarlerpoq

Neriorsuutaareersimasut avaqqutiinnarlugit aningaasanut inatsisissatut siunnersuut amigartoornissamik takutitsimmat tutsuiginassutsimik innarliivoq. Iluatungiliuttuni Partii Naleqqameersoq Anthon Frederiksen taama isumaqarpoq. Taassuma akitsuutinik qaffaaqqinnissaq akerleraa aningaasanillu isaatitsivissanik ujarleqqusilluni.

Allattoq Nauja Møller

aggustip 13-at 2015 04:31

- Ukiup affaata ingerlanerinnaani nunatta naatsorsuutai 146 millioninik nikeriarsinnaappata, taava pinngitsoorani aqutsineq pitsaanngilaq, Anthon Frederiksen oqarpoq.

Aningaasaqarnermut Naalakkersuisup Aningaasanut inatsisissatut siunnersuutip saqqummiunnerani oqaatigaa akitsuutinik qaffaasoqassasoq.

Aamma atuaruk Ikioqatigiilluta aaqqiissutissamik ujartuisariaqarpugut

Akitsuusiiniarneq isumaqataaffigineqanngilaq

Nunatsinnilu suliffissaaleqisut nalunaarsorsimasut juunimi 2015-mi 3592-sut Naatsorsueqqissaartarfimmit nalunaarutigineqarpoq. Taamaatsillugulu aningaasanik innuttaasunit aallernissaq naapertuuttutut Anthon Frederiksenip isiginngilaa:

- Ullumikkut taamaattoqartillugu akitsuutinik aallerniarsarineq pissusissamisuunngilluinnarpoq.

Ukioq mannamut aningaasanut inatsisissaq Naalakkersuisut februaarimi saqqummiukkamikku neriorsuipput, aappaagu aningaasanut inatsit sinneqartooruteqarfiussasoq. Kisianni taamaanngilaq, Anda Uldumip maanna saqqummiussaa ukiup tulliani 65 millionit koruuninik amigartooruteqarfiusussatut saqqummiunneqarpoq. Tamatuma illuatungaanut mumisinneqarnissaa Partii Naleqqamit Inatsisartunut ilaasortap ujartorpaa.

- Naalagaaffimmit tapiissutigineqartartut allanngoriartortinnagit, taamatut inissisimaannassagutta akitsuutitigullu isertitat ikiligaluttuinnartut, taava takusinnaavarput pinngitsoorani ajortoqartussaavoq. Tamannalu pinngitsuussagutsigu aningaasarsiorfissatsinnik pilersitsisariaqarpugut.

Raajartassat qaffanneqarlik

Ukioq manna raajartassat Pinngortitaleriffimmit inassutinit amerlanerupput. Aamma Pinngortitaleriffimmit isumaqarput, raajartassat siunissami suli ikinnerusariaqartut.

Tamaakkaluartoq Anthon Frederiksen isumaqarpoq, Nunatta Karsiata isertitai amerliniassammata raajartassat amerlineqartariaqartut.

- Pisassiissutit apparaluttuinnartut, isumaqarpugut uagut appartikkiartuinnarnagit siorna pisassiissutigineqartut qaffasissusaannut inissinneqartariaqartut. Pissutigalugu Nunatta avannarpasissortaani siorna misileraalluni raajarniarneq pitsaasumik takutitsereerpoq. Taajanna annertunerusumik atorneqartariaqalerpoq, Partii Naleqqamit Anthon Frederiksen taama oqarpoq.