Politikki

Partii Naleqqap Inatsisartuni ilaasortai allanngortut

Partii Naleqqap naalakkersuisoqatigiinnit tunuarnerata kingorna Inatsisartuni ilaasortai allanngorput. Partii Naleqqap Inatsisartunut ilaasortaatitaata siulittaasuat, partiillu politikkikkut oqaaseqartartua Jens Napãtôk, tusagassiutinut taama nalunaaruteqarpoq.

Allattoq Mads Lynge

septembarip 28-at 2018 11:23

Jens Napãtôk Partii Naleqqap inatsisartuni ilaasortaatitaasa siulittaasuattut, partiillu politikkikkut oqaaseqartartuaatut ingerlaqqippoq, Pele Brobergilu inatsisartunut ilaasortaanerminut uterpoq.

Partii Naleqqallu siulittaasuata Hans Enoksenip, Inatsisartut siulittaasuattut maanna issiagallartup, Inatsisartut ataatsimiinerat aallartippat Inatsisartunut ilaasortatut uternissaa naatsorsuutigineqarpoq.

AAMMA ATUARUK Partii Naleqqap peqataajunnaarnera tupaallaatigineqanngitsoq

Emanuel Núko, Inatsisartuni sinniisutut ilaasiortaasimasoq, tamanna pillugu Pele Brobergimut sinniisooreerluni ilaasortaajunnaassaaq. Anthon Frederiksen, naalakkersuisoqataajunnaarnerup kingorna tamaalilluni naalakkersuisuni ilaasortaajunnaassaaq, inatsisartunilu ilaasortaanngimmat politikkikkut sulinera tamaanga killeqarallarluni.

Partii Naleqqap politikkikkut oqaaseqartartua, Inatsisartunilu ilaasortaatitaasa siulittaasuat, Jens Napãtôk taama nalunaaruteqarpoq.

AAMMA ATUARUK Partii Naleraq uani naalakkersuisooqataajunnaarpoq

AAMMA ATUARUK Partii Naleraq Naalakkersuisooqatigiinnit peqataajunnaartoq

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.