Assi: Morten Heilmann/KNR

Olsvig: Partii Naleqqap aningaasaqarnermik paasinnittaasia akisussaassuseqanngilaq

Inuiaqatigiinni nutaaliaasuni Parti Naleqqap aningaasaqarnermik paasinnittaasia akisussaassuseqanngilluinnartuuvoq. Inuit Ataqatigiit siulittaasuat Sara Olsvig taama isumaqarpoq.

Parti Naleqqap Kalaallit Nunaata naalagaaffittut 2021-imi namminersortunngornissaanik kissaataa, tamatumalu inuiaqatigiinnut aningaasaqarnikkut kingunerisinnaasai nassuiarnagit Aviisimi Jyllands-Postenimi allaatigisamini isornartorsiorpaa.

AAMMA ATUARUK Namminersulivinnissaq Partii Naleqqap anguniagarissavaa

Aammattaaq Nunatta Qitornaasa namminersulernissap naammassilertorneqarnissaanik oqalunnerat Inuit Ataqatigiit siulittaasuata isornartorsiorpaa, allaanngimmat nipituuliorunik namminersulernissamut sukkanerusumik tunngaviliissalutik.

Sara Olsvigip erseqqissaatigaa, Kalaallit Nunaata siunissami namminersulernissaa Inuit Ataqatigiit kissaatigimmassuk, aatsaalli aningaasaqarneq inooqataasutullu akisussaaffeqarnerit inissaminiilerpata.

AAMMA ATUARUK Nunatta 2021-mi naalagaaffinngornissaa piviusunngortikkuminaassinnaavoq

Allaatigisaminittaaq Olsvigip danskit tusagassiuutaat isornartorsiorpai Partii Naleqqap Nunatta Qitornaasalu nalunaarutaat qineqqusaarnermi matumani sammineqartussatuatut sallerpaatinneqarmata.

AAMMA ATUARUK Nunaqavissuinnaat siulersuisuniissapput

 

 

Isummersuutit