Partii Naleqqap siunnersuutaa Naalakkersuisut itigartitssutigaat

Illuatungiliuttut Partiiat Naleraq naapertorlugu nunatta karsia million koruuninik arlalinnik sipaaruteqarsinnaavoq, Namminersorlutik Oqartussat maannakkut sillimmasiisarfinnut akiliutigisarmatigit. 

Inuussutissarsiornermut Naalakkersuisoq akissuteqateqarluni allappoq,  Namminersorlutik Oqartussat sillimmasiisarfimmik pilersitsippat tamanna innuttaasunut akileraartartunullu akisunerussasoq.

100 millionit koruunit nunatta karsianit akiliutigineqartarput

Partii Naleqqamit nalilerneqarpoq, sillimmasiisarfinnut nunanit allanit pigineqartunut akiliutigineqartartut 100 millionit koruuninik sinneqartut nunatta karsianit akiliutigineqartartut.

Namminersorlutik Oqartussat pigisaannik sillimmasiisarfimmik pilersitsinissamik kissaatigineqanngitsoq Naalakkersuisut akissuteqaataanni atuarneqarsinnaavoq.

Siunnersuuteqartoq Anthon Frederiksen isumaqarpoq, Naalakkersuisut akissuteqaataat naammanngitsoq.

- Namminersorlutik oqartussat sillimmasiisarnerannut aningaasartuutit kisiisa taasimavaat. Uanga siunnersuuteqarninni taakkua ilanngullugit aamma apeqquteqaammi akissutigineqartut allat aamma namminersorlutik oqartussat suliffeqarfiutaanni 34,9 millioni koruunit tunngavilersuutinnut ilaapput. taakkua ilanngussimanngilaat, Anthon Frederiksen, Partii Naleraq, taama KNR-imut oqarpoq.

Naalakkersuisut suliffeqarfimmik inuussutissarsiutinik ingerlataqartumik ingerlatsinianngillat, suliffeqarfiit namminersortut iluanaarutigalugu  ingerlassinnaasaannik. Sillimmasiisarfik Namminersorlutik Oqartussanit pigineqartoq, pisortat aningaasaqarneranut aamma nunatta karsianut aarlerinartoqarpallaartoq Naalakkersuisut akissuteqarlutik allapput.

- Naalakkersuisut akissuteqaataat piviusorsiortutut isiginngilarput, upperinngilarput nunatta avataanit aqunneqarneq, nunatta avataaniit ingerlatsineq ingerlaannaassappat tamanna nunatsinnut akikinneruneranik oqarneq upperinngilarput, Anthon Frederiksen oqarpoq.

- Taamaattumik suliaq una Partii Naleqqamit nangeqqissavarput, Anthon Frederiksen oqarpoq.

Naalakkersuisut akissuteqaatiminni tikkuarpaat, Namminersorlutik Oqartussani arlaleriarluni annertuunik ajoqusertoqartarsimasoq, taakkualu iluarsiiffiginiarlugit 100 millionit koruunit sinnerujussuarlugit akeqartarsimasut.

Nunatta karsianut kinguneqartussanngortut

Sillimmasiisarfimmik Namminersorlutik Oqartussanit pigineqartumik ajoqusernerit akilerneqartussaagaluarpata, sillimmatinut akiliutit nunatta karsiata taamaalillunilu akileraartartunit akilerneqartussanngussagaluarput,  matumani ingerlatseqatigiiffiup aningaasaqarnera aqqutigalugu taarsiissutigineqartussat akilersinnaassanngippagit.

- Tamannami aarlerinartortaqarpallaaqaaq, Partii Naleqqap siunnersuutaanut Naalakkersuisut akissuteqarlutik taama allapput.