Partii Inuit sinerissami sumiiffinni arfineq-marlunni immikkoortortaqarfiliulersoq

Partii Inuit ulluni makkuni partiitut ukiumik ataatsimik nalliuttorsiorpoq, tassungalu atatillugu partii nukittorsarniarlugu illoqarfinni immikkoortortaqarfinnik aallartisaanialerluni.

- Partii inuit sutigut tamatigut kalaallinik nukittorsaaneq anersaaraarput, aammalu paquminartut toqqortiinnalikkat qaqilernissaat sapiissuseqarfingalugu sulinerput nagikkumavarput kalaaleq nunamini missukutaassanngimmat, Nikku Olsen allappoq.

Partii Inatsisartunut qinersisoqarnerani aallartilluarpoq, Nikku Olsenip taaguunneqarluarneratigut partii Inatsisartuni marlunnik ilaasortaatitaqalerluni. Kingornali paasineqarpoq Nikku Olsen nakuusersimanini pissutigalugu pineqaatissinneqarsimanermigut qinigaasinnaatitaanngitsoq. Taamaammat Lars Mathæussenimit taarserneqarpoq, taannali kingorna partii qimallugu Siumumut ilaasortanngorluni. Randi Broberg partii sinnerlugu Inatsisartuni ullumikkut ilaasortatuaavoq.

- Ullumikkut pisariaqartilluinnarpagut namminneq pisariaqartitarpiagut aallaavingalugit inuiattut alloriaateqaqqinnissarput. Taamaakkaluartoq avataaneersut pisariaqartitaat aallaavigiuarpagut annertuallaartumik. Partii Inuit unitsinneqarsinnaajunnaarluta aallareerpugut, angusassarput angeqaaq, Nikku Olsen nassuiaavoq.