Politikki

Folketingimut qinersineq 2015 Partii Inuit piffissakilliortut

Folketingimut juunip ulluisa 18-ianni qinersisoqarnissaanut atatillugu qinigassanngortinniaraanni piffissaq killissarititaq tassaavoq sapaat juunip ulluisa arfineq-aappaat nalunaaqutaq ulloqeqqanut. Naalagaaffiup Sinniisoqarfia taama nalunaaruteqarpoq.

Allattoq Jonas Løvschall-Wedel, Mads Lynge

juunip 06-at 2015 15:45

Partiilu Inatsisartuni maanna ilaasortaatitaqanngitsoq Partii Inuit qinigassanngortitsiniaruni atsiornernik katersisariaqarpoq. Taama piumasaqartoqarnera partiimut tupaallannarsimavoq, atsiornernillu piffissaq kingulleq atorlugu maanna katersisoqaleruttorpoq:

- Partii Inuit sinnerlugit qineqqusaarniaraluaratta inuit marluulluta, tassa Qeqertarsuarmiu Georg Olsen, taavalu uanga poul Bloch Jensen, Nuummiu. Taava sunaaffa partiitta Inatsisartuniinnginnera, aporfeqalaarnera pillugu taava massakkut misissuivugut aqqutissiuisinnaanerluta, Poul Bloch Jensen Partii Inuit sinnerlugit taama oqarpoq.

Aamma atuaruk Partii Inuit nutaamik siulersuisuuneqalerput

Partiit Inatsisartuni ilaasortaatitaqanngitsut malittarisassat naapertorlugit atsiornernik 100-nik sassarniartumut ataatsimut katerseqqaartussaapput, assersuutigalugu marlunnik sassartitaqarniarunik atsiornernik 200-nik katersisussaallutik. Suliarlu tamanna partiimit ulapputigineqaleruttortoq Poul Bloch Jensenip oqaatigaa.

Kalaallisut oqaatsivut pingaarutilittut suli inissisimanissaat Partii Inuit suliniutigaat, kalaallisuinnarli oqaluttoqarnissaanik partiip aallartinnerani anguniarneqartoq soorluuna qasukkaamisimasoq, tassami Tunuminngaanneersuuguit, kitaamiuuguit, avannaamiuuguit kujataaniuuguilluunniit oqaatsitit atorsinnaasariaqarpatit, qallunaatulluunniimmi aamma oqalussinnaasariaqarsinnaallutit, Partii Inuit oqarpoq.

Kalaallit Nunaatalu namminiilivinnissaa taassuma saniatigut Partii Inuit suliniutiginiarpaa. Nunatta namminiilivinnissaanut suliniutit Inatsisartunit suliarineqartussaavoq, namminiilivittunngorsinnaanittami Inatsisartunit akisussaaffigineqarpoq.

Aamma atuaruk Partii Inuit siunnersuutaat kukkuneqaqisut

Nunattali namminiilivittunngoriartornissaanut aqqut suli takivoq, anguniagarli anguneqarpat Danmarkip suli suleqatigilluarneqarsinnaanera Poul Bloch Jensenip takorloorpaa:

- Oqaatigiuaannarnikuusarput aallaavigalugu Danmarki qanimut suleqatigeqqissaarlugu. Tassa imaappoq: Namminersulivinniarneq,naalagaaffinngorneq, siunertaraarput, kisianni qanimut suleqatigiilluta, Poul Bloch Jensen, Partii Inuit, taama oqarpoq.

Folketingimullu qinigassanngortinniaraani piffissaq nalunaarfissaq kingulleq tassaavoq sapaat juunip arfineq-aappaat nalunaaqutaq ulloqqeqqa.