Partii Inuit siunnersuutaat kukkuneqaqisut
Siunnersuutilli Siulittaasoqarfimmut nassiussaat misissoraanni kukkuneqartiterput.
Partii Inuit Inatsisartuniinnerat pakatsiffiusimavoq, oqaluuserisassatut siunnersuutit Inatsiartuni oqaluuserisassanngornatilluunniit akuerineqanngitsoortut.
- Tassa qallunaatut allannginnatsigit, Nikku Olsen qineqqusaarnermi oqarpoq.
Tamannali eqqunngilaq. Radioaviisimit siunnersuutit misissorneqarput, paasivarpullu piumasaqaatinik naammassinnissimanngitsut, taamaattumillu atorfilinnit siunnersorneqareerluni Inatsisartut siulittaasoqarfiata itigartissimavai.
Takuneqarsinnaavoq siunnersuutit aningaasatigut kingunissaat suliarineqarsimanngitsut, patsisilersuutit ataqatigiinngitsut, Inatsisartut Naalakkesuisullu suliaannik akulerussuineq, akuersissutissatut siunnersuutit inatsisissatullu siunnersuutit akulerussorneri. Aammattaaq arlaleriarluni siunnersuutit sorpiaaneri paasisassaanngitsut.
Siunnersuutinit 30-isusunit taamaallaat ataaseq nutserneqarsimannginnera pillugu itigartinneqarsimavoq.
Partii Inuit itigaritsinernut peqqutaasut tigusimavaat, taakkunani Nikku Olsenip atuarsinnaavai, taamaallaat oqaatsit pineqanngitsut, amerlanerpaatigulli imarisai pineqarsimasut.
Inatsisartut allattoqarfiata oqaluttuaraa, Partii Inuit siunnersuutit isikkussaat pillugit siunnersorneqarnissamik qinnuteqarsimanngittut, tamannalu uggornartuusoq Inatsisartunimi siunnersuisinnaaneq politikerinut tamanut ammangaluarpoq.
Partii Inuit siunnersuut ataaseq pillugu saaffiginnissimapput, tassa siunnersuut siusinnerusukkut itigartinneqarsimasoq
ingerlateqqinniarlugu. Tamannalu pivoq periarfissaq kingulleq ullormik ataatsimik sioqqullugu, Inatsisartulli allattoqarfiata siunnersuut kukkunerpassualik aaqqiivigisinnaasimanngilaa.
Siulittaasup Nikku Olsenip AG-mi sapaatip akunnerani uani saqqummersumi KNR isornartorsiorpaa siunnersuutertik eqqartorsimanngimmagu.
KNR-ip siusinnerusukkut Partii Inuit siunnersuutaat pissarsiarai, itigartinneqarnerannulli tunngavilersuutit aamma pissarsiariniarsarigaluarpai. Taarsiullugu Randi Broberg saaffiginnippoq partiip siunnersuutaasa pappialartai utertinniarlugit. Tamannali KNR-ip itigartippaa.
Kiisamili ippassaq Partii Inuit Inatsisartut siulittaasoqarfiata itigartitsinerminut tunngavilersuutaasa allassimaneri nassiuppai.
2013-imili qinersineqarmat Partii Inuit apeqqutinik § 37 naapertorlugu nassitsisimanngillat. Taamaaliornissaminnullu qinnuteqarsimanatik. Tamanna atuarneqarsinnaavoq Inatsisartut 2013-imut nalunaarutaanni, 2013-imi § 37 naapertorlugu apeqqutit katillugit 266-it nassiunneqarsimapput.
