Per Rosing Petersen Partii Inuit siulittaasortaarivaat
Siumumi kingusinnerusukkullu aamma Partii Naleqqami ilaasortaasimasoq, Per Rosing-Petersen, partiip immikkut ittumik ataatsimeersuarnerani Partii Inuit siulittaasuatut toqqarneqarpoq.
Per Rosing-Petersen tusagassiorfinnut nalunaaruteqarluni allappoq Nunatta ineriartorneranut naapertuuttumik alloriaqqinnissaq pisariaqarsimasoq, tassanilu pingaaruteqarsimasoq Partii Inuit ersarinnerusumik politikkikkut akuunerulernissaa, uanilu immikkut ataatsimeersuarnermi tamanna pisoq.
Aamma atuaruk Per Rosing Petersen Partii Naleqqamit ilaasortaajunnaarsinneqartoq
- Nipi ersarissoq nangaanngitsoq, tunuliaqutaqaqqilerpoq, inuiannillu kiffartuussinissarput suleqataanissarput sapinngisarput tamaat, nukingut tamaasa atorlugit alloriaqqinnermik ammaassivoq – atungarissaarnerulernissaq siammasinnerusoq – akuunerulersitsisoq, inuiattut naleqartitagut tunngaviginerullugit sanarfissallugu alloriaqqilerpugut illillu inuk, peqatiseraatsigit, Per Rosing-Petersen taama allappoq.
Siulersuisuunerit nutaat tassaapput:
Siulittaasoq: Per Rosing-Petersen
Siulittaasup tullia siulleq: Paaliit Mølgaard
Siulittaasup tulliata aappaa: Aannguaq Poulsen
Siulersuisuni ilaasortat: Frederik Lange, Jens Peter Lange, Nikku Olsen aamma Poul Bloch Jensen
Aamma atuaruk Partii Inuit: Taamaattumik qallunaatut oqalunnianngilagut
Inatsisartunut qinersinermi kingullermi qinigaatitaqanngitsoortut
Partii Inuit 2013-imi pilersinneqarput. Partii Inuit akerliuniarluni partiitut pilersinneqarput, danskit Nunatsinni sunniuteqarnerisa akiorniarnissaanik siunertaqarlutik, ilaatigullu danskit oqaasii tamatumani pineqarput.
Inatsisartunut 2013-imi qinersinermi Partii Inuit 6,4 procentinit taaguunneqarput, kingornalu Siumut Atassullu naalakkersuisunngortitseqatigalugit. Nunatsinnili uranimik piiaanissaq pillugu isumaqatigiinngissuteqarneq pissutigalugu qaammatit arfineq-marluk qaangiummata Naalakkersuisunit peqataajunnaarsinneqarput.
Inatsisartunut 2014-imi qinersisoqarmat Partii Inuit qinigaatitaqanngitsoorput.
